პარტია დროა მოუწოდებს საგარეო საქმეთა სამინისტროს, გამოხატოს მხარდაჭერა უკრაინის მიმართ და მკაფიო განცხადება გააკეთოს. დროას წევრი ბათუ ქუთელია ამბობს, რომ მიესალმება ამერიკის შეერთებული შტატების პრეზიდენტ ჯო ბაიდენის მიერ რუსეთის პრეზიდენტ ვლადიმერ პუტინთან ვიდეოზარისას დაფიქსირებულ პოზიციას.

"ჩვენ არ გვესმის მხარდამჭერი განცხადებები საქართველოს ხელისუფლების მხრიდან. ჩვენ გვინდა მოვუწოდოთ საქართველოს საგარეო საქმეთა სამინისტროს საქართველოს ოფიციალურ პოზიციასთან დაკავშირებით, გამოხატოს მხარდაჭერა უკრაინის მიმართ და ასევე გაიზიაროს ის სულისკვეთება, რაც გამოხატული იყო აშშ-ს, ევროკავშირის და ასევე ევროპელი სახელმწიფოს ლიდერების მხრიდან. მათ შორის, რუსეთზე დაწესებული სანქციების მხრივ და ასევე უკრაინისთვის დახმარების აღმოჩენის კუთხით. გააჟღეროს კონკრეტული ინიციატივები, ასევე მოითხოვოს კონსულტაციები ჩვენს პარტნიორებთან", — თქვა ქუთელიამ.

დროა გეგმავს, რომ დააორგანიზოს აქცია, რათა უკეთ გამოხატონ მხარდაჭერა უკრაინელი ხალხის მიმართ.

დღეს, 8 დეკემბერს პრეზიდენტმა სალომე ზურაბიშვილი უკრაინას სოლიდარობა გამოუცხადა და კიდევ ერთხელ დაადასტურა უკრაინის სუვერენიტეტისა და ტერიტორიული მთლიანობის მიმართ სრულ მხარდაჭერასა და ერთგულება.

აშშ-მ და მოკავშირე ოფიციალურმა პირებმა განგაში ჯერ გასულ თვეს ატეხეს. ამერიკული დაზვერვის წარმომადგენლებმაც მოკავშირეები გააფრთხილეს, რომ ცოტა დრო დარჩა, რათა რუსეთს უკრაინაში სამხედრო მოქმედებების განხორციელებაში ხელი შეუშალონ. აშშ-მ ევროპულ ქვეყნებს მოუწოდა შეერთებულ შტატებთან იმუშაონ, რათა მოსკოვის შეკავების მიზნით ეკონომიკური და სამხედრო ზომების პაკეტი შეიმუშაონ.

უკრაინის თავდაცვის სამინისტრომ ნოემბრის დასაწყისში განაცხადა, რომ მის საზღვართან დაახლოებით, 90 000 რუსი ჯარისკაცი გადაისროლეს. გაურკვეველი იყო, რამდენი მათგანი იყო ადგილზე ახლად განლაგებული.