სახალხო დამცველის, ნინო ლომჯარიას განცხადებით, ექსპრეზიდენტის სასამართლო პროცესი საჯარო უნდა იყოს. ომბუდსმენის თქმით, სააკაშვილს და მასთან ერთად საზოგადოებას სასამართლო პროცესზე დასწრების საშუალება უნდა მიეცეს. ლომჯარია ამბობს, რომ საჯაროობა მაშინაც უნდა შენარჩუნდეს, თუკი ის პროცესს ჯანმრთელობის მდგომარეობის გამო ვერ დაესწრება.

"უნდა დაესწროს უშუალოდ პროცესს, სადაც საზოგადოებას ექნება დასწრების შესაძლებლობა, სადაც ეს პროცესი უნდა იყოს საჯარო. თუ ფიზიკური დასწრება ჯანმრთელობის მდგომარეობის გამო შეუძლებელი იქნება, ეს უნდა იყოს საჯარო პროცესი. ჩვენ უნდა ვხედავდეთ როგორ გამოდის ბრალდებული და როგორ ამტკიცებს მის უდანაშაულობას, ან საკუთარ პოზიციებს აჟღერებს, ნებისმიერ შემთხვევაში საჯაროობის პრინციპი უნდა იყოს უზრუნველყოფილი", — განაცხადა ლომჯარიამ TV პირველის ეთერში.

მისივე თქმით, სააკაშვილის აქამდე გამართული სასამართლო პროცესები იმის იმედს არ იძლევა, რომ მისთვის სამართლიანი სასამართლო გარანტირებული იქნება.

"ეს იქნება ალბათ ყველაზე მთავარი გამოწვევა სამომავლოდ — სამართლიანი სასამართლოს უფლების დაცვა, მასში ჯეროვანი მონაწილეობა, რაც გულისხმობს უშუალო მონაწილეობას, პროცესის საჯაროობას, რაც არის აუცილებელი სტანდარტი და პირობა, რომ სტრასბურგის სასამართლომ სამართლიანი სასამართლოს უფლების დარღვევა არ დაადგინოს", — ამბობს ის.

22 ნოემბერს იუსტიციის მინისტრმა, რატი ბრეგაძემ განაცხადა, რომ ექიმების შესაბამისი დასკვნის შემთხვევაში, შესაძლოა, მიხეილ სააკაშვილი შემდგომ სასამართლო პროცესზე დარბაზში მიიყვანონ.

ამ დრომდე მიხეილ სააკაშვილი მის არცერთ სასამართლო პროცესს არ დასწრებია. ჯერ კიდევ 5 ნოემბერს იუსტიციის მინისტრმა თქვა, რომ მათი რეკომენდაცია იყო სასამართლო სხდომა ციხეში ჩატარებულიყო, რასაც ადვოკატები და თავად სააკაშვილი არ ეთანხმებოდნენ. 9 ნოემბერს ცნობილი გახდა, რომ სასამართლომ მოსთხოვა პენიტენციურ სამსახურს სააკაშვილი სხდომაზე მიეყვანათ, თუმცა უშედეგოდ — 10 ნოემბერს სააკაშვილის პროცესი მის გარეშე გაიმართა. უარის მიზეზი უწყებამ იმით განმარტა, რომ ესკორტირებისას, შესაძლოა, მოხდეს "დესტრუქციული ხასიათის ქმედება". მათივე მტკიცებით, ვინაიდან სააკაშვილს შეწყვეტილი ჰქონდა მკურნალობის არსებითი ნაწილი, პროცესზე გაყვანა და დასწრება წარმოადგენდა დამატებით რისკს მისი ჯანმრთელობისთვის. მომდევნო სხდომაზე, 15 ნოემბერს სააკაშვილი ისევ არ მიიყვანეს და მიზეზებიც იგივე დაასახელეს. 16 ნოემბერს ომბუდსმენმა მოითხოვა, რომ სააკაშვილს სხდომაზე დასწრების უფლება მისცენ, თუმცა ესეც უშედეგო აღმოჩნდა და ექსპრეზიდენტი არც იმ დღეს გამართულ სხდომაზე მიუყვანიათ.