იუსტიციის მინისტრის, რატი ბრეგაძის განცხადებით, მათი რეკომენდაცია იქნება, რომ ექსპრეზიდენტის, მიხეილ სააკაშვილის პროცესი პენიტენციურ დაწესებულებაში ჩატარდეს. ამის შესახებ მან რუსთავი 2-ის ეთერში ისაუბრა.

"შესაძლებელია, რომ სასამართლო პროცესი ჩატარდეს სხვა ადგილასაც. ბუნებრივია, ჩვენი მკაცრი რეკომენდაცია იქნება ის, რომ პატიმარი არ იქნეს გაყვანილი მე-12 დაწესებულებიდან, იმიტომ, რომ როგორც მოგახსენეთ, აქ, შეიძლება, საფრთხე წარმოეშვას უშუალოდ მას და სწორედ მისი უსაფრთხოების ინტერესებიდან გამომდინარე, ჩვენ ვალდებული ვართ, დავიცვათ ის და მართლწესრიგი.

თუკი, სასამართლოსთან იქნება გარკვეული პროვოკაცია, მერე ვინ აგებს ამაზე პასუხს? ან რა რაოდენობის ძალა უნდა გამოიყენოს სახელმწიფომ? არ შეიძლება, რომ მთელი რესურსი მიმართული იყოს ერთი ადამიანის დაცვასა და ამ მუდმივი პროვოკაციების თავიდან არიდებაზე", — განაცხადა მან.

ბრეგაძემ დღეს განაცხადა ისიც, რომ სააკაშვილის ჯანმრთელობის მდგომარეობა სტაბილურია და გარკევული დროის შემდეგ მან ფაფები და წვენები მიიღო. ამის პარალელურად, ექსპრეზიდენტის ადვოკატის, ნიკა გვარამიას თქმით, მიხეილ სააკაშვილის მდგომარეობა მძიმდება და მოსალოდნელია კოლაფსი. მისივე თქმით, ექსპრეზიდენტის ფსიქიკას და აზროვნებას უკვე ეტყობა სერიოზული კვალი.