დღეს, 20 მაისს, მთავრობის კანცელარიასთან, თბილისის სახელმწიფოს უნივერსიტეტის საერთაშორისო ურთიერთობების ფაკულტეტის სტუდენტების ორგანიზებით აქცია გაიმართა ლოზუნგით "რუსეთი კლავს". პროტესტი 19 მაისს, ზუგდიდის რაიონის სოფელ ხურჩაში, საოკუპაციო ხაზთან ახლოს მომხდარი მკვლელობის გამოხმაურება იყო.

ფოტო: გვანცა ნემსაძე / On.ge

ფოტო: გვანცა ნემსაძე / On.ge

აქციის ორგანიზატორები აღნიშნულ ფაქტთან დაკავშირებით სახელმწიფო უსაფრთხოების სამსახურის განცხადებას სამარცხვინოს უწოდებენ და აცხადებენ, რომ მსგავს შემთხვევებში სწრაფად უნდა მოხდეს გამოძიება და მოქალაქეების ინფორმირება. მათი მოთხოვნით, აბაშიძე კარასინის ფორმატში უნდა დადგეს დამნაშავეების გადმოცემის საკითხი. სუს-მა მომხდარი ფაქტი დაგმო და აღნიშნულის თაობაზე ინფორმაცია მიაწოდა ევროკავშირის სადამკვირვებლო მისიას.

ფოტო: გვანცა ნემსაძე / On.ge

აქციას ესწრებოდნენ არასამთავრობო ორგანიზაციების წარმომადგენლები. სიდას ხელმძღვანელმა ზვიად დევდარიანმა განაცხადა, რომ ეს ფაქტი არის საზოგადოების საწუხარი და რუსეთ საქართველოს ურთიერთობები საზოგადოებისთვის ერთ-ერთი პრიორიტეტული თემაა.

ასევე, პროტესტს შეუერთდნენ ახალი პოლიტიკური ცენტრის, "გირჩის", ლიდერები და წევრები. ზურაბ ჯაფარიძის თქმით, საოკუპაციო ხაზთან მომხდარი მკვლელობის შესახებ, რუსეთის საგარეო საქმე სამინისტროს განცხადება, არის საბჭოთა ტრადიციებში გაკეთებული განცხადება.

19 მაისს, დაახლოებით 14:30 საათზე ზუგდიდის რაიონის სოფელ ხურჩაში, საოკუპაციო ხაზის მიმდებარედ, ოთხმა შეიარაღებულმა პირმა ცეცხლსასროლი იარაღით გალის რაიონის სოფელ ბარღების მკვიდრ გიგა ოთხოზორიას ჭრილობა მიაყენა, რის შედეგადაც ის გარდაიცვალა.