ალასკის სანაპიროსთან, ბერინგის ზღვაში, აშშ-ის სანაპირო დაცვამ 15 წლის ბიჭი გადაარჩინა. ბიჭი, სახელად პარკერი, ამოყირავებულ სათევზაო ნავზე დღეების განმავლობაში იჯდა. პარკერი ძმასთან და ბიძაშვილთან ერთად, მცირე ზომის ნავით სათევზაოდ პარასკევს გავიდა, უკან კი კვირას უნდა დაბრუნებულიყო. რადგან ნავი კვირას არ გამოჩნდა, სამაშველო ოპერაცია დაიწყო. თუმცა, ცუდი ამინდის გამო, სანაპირო დაცვის თვითმფრინავმა ზღვის დათვალიერება მხოლოდ ორშაბათს შეძლო. ბიჭთან ერთად მყოფი ძმა და ბიძაშვილი დაიღუპნენ.

ორშაბათს პილოტმა ჯონათან რეშმა მოზარდი ამოყირავებულ ნავზე შენიშნა, რაც მისი აზრით, ნამდვილი სასწაული იყო. პილოტის თქმით, ასეთ პირობებში (წყლის ტემპერატურა დაახლოებით 4°C იყო) ადამიანების გადარჩენა თითქმის შეუძლებელია.

ფოტო: NBC

გადარჩენილი ბიჭის ძმის, დარენ ტული-ნუნგვუკის თქმით, მათი ოჯახი თევზჭერით არის დაკავებული, რის გამოც ზღვაში ხშირად დღეების განმავლობაში უწევთ ყოფნა. ეს კი რთული და ფიზიკურად დამღლელი საქმეა. როცა ნავის ძრავა სათევზაო ბადეში გაიხლართა, დარენის თქმით, ბიჭები უკვე ძალაგამოცლილები იყვნენ, ამიტომ უბრალოდ ისხდნენ, გვიან ღამით კი ამინდიც გაფუჭდა.

პარკერის ძმა, სიდნი, ამინდის გაუარესების შემდეგ სამაშველო ჟილეტის მისაწოდებლად გარბოდა, რა დროსაც თოკებში გაიხლართა და ნავიც გადაბრუნდა. პარკერმა და მისმა ბიძაშვილმა ამოყირავებულ ნავზე აძრომა მოახერხეს, თუმცა, როგორც დარენი ამბობს, სიდნი პირველი დაიღუპა. პარკერის ბიძაშვილს კი მალევე პანიკა დაეწყო.

"ჩვენი ბიძაშვილი ძალიან შეშინდა და წყალში გადახტა. მან მხოლოდ ორიოდე მეტრის გაცურვა შეძლო და სამწუხაროდ, დაიხრჩო", — ამბობს დარენი. ამის შემდეგ პარკერი ნავზე მარტო დარჩა, თუმცა სიმშვიდეს ინარჩუნებდა, რადგან სჯეროდა, რომ მისი უფროსი ძმა ზეციდან მფარველობდა.

"მთელი დრო მუხლებზე იდგა და ლოცულობდა. სჯეროდა, რომ გადარჩებოდა. სჯეროდა, რომ იპოვიდნენ და უსაფრთხოდ იქნებოდა და ასეც მოხდა", — დასძინა დარენმა.

მას შემდეგ, რაც პილოტმა პარკერი წყალში შენიშნა, ბიჭთან ყველაზე ახლოსმყოფი სამოქალაქო გემი მივიდა და მოზარდი ბორტზე აიყვანა. პარკერს ჰიპოთერმიის სიმპტომები აღენიშნებოდა. მაშველებმა წყლიდან ორი დაღუპულის ცხედარიც ამოიყვანეს. სანაპირო დაცვამ სამძიმარი გამოუცხადა დაღუპულთა ოჯახებს და მადლობა გადაუხადა ყველას, ვინც ერთი ადამიანის სიცოცხლის გადარჩენაში მიიღო მონაწილეობა.