დღეს, 19 მაისს, დაახლოებით 14:30 საათზე ზუგდიდის რაიონის სოფელ ხურჩაში, საოკუპაციო ხაზის მიმდებარედ, ოთხმა შეიარაღებულმა პირმა ცეცხლსასროლი იარაღით გალის რაიონის სოფელ ბარღების მკვიდრ გიგა ოთხოზორიას ჭრილობა მიაყენა, რის შედეგადაც ის გარდაიცვალა. ამის შესახებ On.ge-ს ინფორმაცია სახელმწიფო უსაფრთხოების სამსახურში დაუდასტურეს.

უწყების ცნობით, ინციდენტის შედეგად დაზარალებული მუცლის არეში მიყენებული მრავლობითი ჭრილობებით სასწრაფო სამედიცინო დახმარების ჯგუფმა ზუგდიდის ჰოსპიტალში გადაიყვანა, სადაც ის მოგვიანებით გარდაიცვალა:

"საქართველოს სახელმწიფო უსაფრთხოების სამსახური გმობს ხურჩაში მომხდარ ფაქტს. აღნიშნულის თაობაზე ინფორმაცია მიეწოდა ევროკავშირის სადამკვირვებლო მისიას".