ევროკავშირის ელჩის, კარლ ჰარცელის განცხადებით, საპარლამენტო მანდატებზე აურის თქმა, შეთანხმებისთვის კარის დახურვას ნიშნავს. ამავდროულად, მისი თქმით, პროცესს აზიანებს ქართული ოცნების ნაბიჯებიც.

"მინდოდა თქვენთან შემეჯამებინა ბოლო კვირა, რომელიც საპარლამენტო მანდატების გაუქმებით დაიწყო, და ვგრძნობდი, რომ ზოგი პარლამენტარისგან ეს იყო გავლენის ქვეშ მიღებული გადაწყვეტილება და შეთანხმების შანსზე კარების დახურვა. თუმცა ამ შეთანხმებისთვის ბრძოლის გაგრძელებას ვაპირებ", — განაცხადა მან.

გარდა ამისა, ელჩი გამოეხმაურა განცხადებებს რევოლუციის შესახებ და აღნიშნა, რომ ეს ნარატივი არაფერში არგია პროცესს.

"[პრობლემის ამ გზით გადაჭრის] მომხრე არავინაა, არც ევროკავშირი, მათ შორის. როცა საქმე ეხება ქუჩის პროტესტს და დემონსტრაციას, აზრების გამოთქმას, რა თქმა უნდა წინააღმდეგი არ ვართ, იქამდე, სადამდეც ის მშვიდობიანია. მაგრამ ვიმედოვნებ, რომ ქუჩის პროტესტი არ იქნება პოლიტიკური დიალოგის ჩამნაცვლებელი და პოლიტიკური კრიზისიდან გამოსვლის გზად ამას არ აირჩევენ", — განაცხადა მან.

ჰარცელმა ისაუბრა მმართველი გუნდის წარდგენილ 2 კანონპროექტზეც და აღნიშნა, რომ ისინი შემაშფოთებელია. მისი თქმით, რეგისტრაციის გაუქმების კანონპროექტი არის გამიზნული ქმედება ოპოზიციური პარტიის წინააღმდეგ.

"ამის შემდეგ წარადგინა მმართველმა პარტიამ ორი კანონპროექტი, ერთი იყო პარტიის რეგისტრაციის გაუქმებაზე და მეორე პარტიების დაფინანსებაზე. ამ ინიციატივებს პროცესისთვის არასახარბიელოა და უფრო ზუსტად რომ გითხრათ, მაშფოთებს კიდეც.

პარტიების რეგისტრაციის კანონპროექტით რომ დავიწყოთ, ეს სხვა არაფერი არაა, თუ არა გამიზნული ქმედება მთავარი ოპოზიციური პარტიის მიმართ. მსგავსი განზრახვები მუდამ კითხვის ნიშნებს ბადებს. ასეთ კანონებს კი ყველა სიფრთხილით უნდა მიუდგეს და გაიაზროს, რას ნიშნავს ის პარტიებისა და საქართველოს მომავლისთვის.

რაც შეეხება მეორე კანონპროექტს, რომელიც პარტიების დაფინანსებას ეხება, ამის მიხედვით, იმ პარტიებს, რომლებიც პარლამეტნში არ შედიან, დაფინანსება შეუწყდებათ. ამაში არის ლოგიკა, რომ ის პარტიები უნდა ფინანსდებოდნენ, რომლებსაც სურთ საკუთარი როლის შესრულება და პასუხისმგებლობების აღება პროცესებზე, როგორც პარტიებს პარლამენტში, მაგრამ არსებობს კიდევ უფრო დიდი არგუმენტი, თუ რას ნიშნავს პარტიების არსებობა დემოკრატიისთვის. რაც არამხოლოდ პარლამენტის სივრცეში წარმოდგენას გულისხმობს", — განაცხადა მან.

პარლამენტის შეკრების დღეს ბარიერგადალახული პარტიების უმრავლესობამ საპარლამენტო მანდატებზე უარი თქვა და ამ ფორმით კიდევ ერთხელ გამოხატა პროტესტი არჩევნების მიმართ, რომლის შედეგებსაც არ აღიარებენ. საპასუხოდ, მმართველ გუნდში დააინიცირეს 2 კანონპროექტი, რომელთაგან ერთი გულისხმობს პარლამენტში შესვლაზე უარსიმთქმელი პარტიებისთვის დაფინანსების შეწყვეტას, მეორე კი ნაციონალური მოძრაობისთვის რეგისტრაციის შეჩერებას ამარტივებს.

ოპოზიციაში მმართველი გუნდის ამ გადაწყვეტილებას ვლადიმერ პუტინის რუსეთისკენ მიმავალი დიქტატორული ნაბიჯი უწოდეს და განაცხადეს, რომ დაშინების გზით მათ პარლამენტში ვერ შეიყვანენ.

გაიგეთ მეტი: