ევროკავშირის ელჩის, კარლ ჰარცელის განცხადებით, მმართველი გუნდი და ოპოზიცია არათუ უახლოვდება, არამედ შორდება ერთმანეთს და ეს ფაქტი შემაშფოთებელია. ამაზე პასუხისმგებლობა ელჩმა ორივე მხარეს დააკისრა და განაცხადა, რომ ბოლო კვირაში მათი ქმედებები, მოლაპარაკების პროცესს აზიანებს.

"ახლა მე იმას ვხედავ, როგორც ფასილიტატორი, რომ ორი მხარე კიდევ უფრო შორდება ერთმანეთს, ვიდრე ერთმანეთს უახლოვდება და ეს ხდება მაშინ, როცა საათი უფრო და უფრო სწრაფად წიკწიკებს და კარები იხურება და ეს მე მაშფოთებს. ვფიქრობ, სიტუაცია სერიოზულია და ჩვენი მოვალეობა ისაა, რომ გამოვიყენოთ მომენტი და ვაჩვენოთ ეს სიტუაცია, რომ უკეთესი გამოსავალი ვიპოვოთ", — განაცხადა მან.

მისი თქმით, მზად არიან, რომ გააგრძელონ მუშაობა და მოხარულია იმით, რომ ორივე მხარე მზადაა საუბრისთვის.

"მაგრამ მნიშვნელოვანია იცოდნენ, როგორ ისაუბრონ და როგორ მიაღწიონ შეთანხმებას. [...] გულწრფელად რომ გითხრათ, არანაირი მოლოდინები არ მაქვს", — განაცხადა მან.

ჰარცელის განცხადებით, საპარლამენტო მანდატებზე აურის თქმა, შეთანხმებისთვის კარის დახურვას ნიშნავს. მისივე თქმით, მმართველი პარტიის მიერ წარდგენილი კანონპროექტები არასახარბიელოა მოლაპარაკების პროცესისთვის და აშფოთებს მას.

გაიგეთ მეტი:

პარლამენტის შეკრების დღეს ბარიერგადალახული პარტიების უმრავლესობამ საპარლამენტო მანდატებზე უარი თქვა და ამ ფორმით კიდევ ერთხელ გამოხატა პროტესტი არჩევნების მიმართ, რომლის შედეგებსაც არ აღიარებენ. საპასუხოდ, მმართველ გუნდში დააინიცირეს 2 კანონპროექტი, რომელთაგან ერთი გულისხმობს პარლამენტში შესვლაზე უარსიმთქმელი პარტიებისთვის დაფინანსების შეწყვეტას, მეორე კი ნაციონალური მოძრაობისთვის რეგისტრაციის შეჩერებას ამარტივებს.

ოპოზიციაში მმართველი გუნდის ამ გადაწყვეტილებას ვლადიმერ პუტინის რუსეთისკენ მიმავალი დიქტატორული ნაბიჯი უწოდეს და განაცხადეს, რომ დაშინების გზით მათ პარლამენტში ვერ შეიყვანენ.

გაიგეთ მეტი: