ევროპული საქართველოს ერთ-ერთი ლიდერის, გიგა ბოკერიას თქმით, ქართული ოცნების ინიციატივა, ენმ-ს რეგისტრაციიდან მოხსნის თაობაზე არის "განაცხადი სრულფასოვანი ავტორიტარიზმისკენ". ამის შესახებ ბოკერიამ მთავარი არხის ეთერში ისაუბრა.

"რეჟიმები, რომლებიც, თუნდაც ასეთ მუქარაზე მიდიან, რომ ოპონენტს, ერთ-ერთ ძირითად და მთავარ ოპონენტს, რეგისტრაციას გაუუქმებენ, რომ ვერ მიიღოს არჩევნებში მონაწილეობა, ეს სხვა ეტაპზე გადასვლაა ავტორიტარული რეჟიმის განაცხადის. რა თქმა უნდა, ერთის მხრივ, ივანიშვილის რეჟიმის სახის კიდევ უფრო გაშიშვლება, ისედაც გაშიშვლებული იყო საზოგადოების თვალში, უბრალოდ, განაცხადია რაზე არის წამსვლელი მუქარის სახით მაინც ეს რეჟიმი და რა თქმა უნდა, თუ კი რამისკენ გვიბიძგებს საზოგადოებას და, მათ შორის, დემოკრატიულ ოპოზიციას, არის გაცნობიერება იმისა, რამდენად მნიშვნელოვანი ეროვნული ამოცანა არის ამ კაცის ხელისუფლებიდან ჩამოცილება მშვიდობიანი გზით. რეგისტრაციიდან მოხსნა მნიშვნელოვანი ოპოზიციური სუბიექტის და მით უფრო, ყველაზე მსხვილი სუბიექტის, არის სერიოზული განაცხადი სრულფასოვანი ავტორიტარიზმისკენ და დიქტატურისკენ", — განაცხადა ბოკერიამ.

ქართული ოცნების მიერ ინიცირებული კანონპროექტი ნაციონალური მოძრაობის არჩევნებიდან მოხსნის პროცედურას ამარტივებს. პარტიის აღმასრულებელი მდივნის, ირაკლი კობახიძის განცხადებით, პარლამენტში ინიციატივის წესით შევიდა კანონპროექტი, რომელიც იმ პოლიტიკური პარტიის საარჩევნო რეგისტრაციის გაუქმებას ითვალისწინებს, რომლის წინასაარჩევნო აგიტაციაში პოლიტიკური ლიდერის რანგში მონაწილეობას მიიღებს პირი, რომელიც აქტიური საარჩევნო უფლების რეალიზაციისათვის კონსტიტუციით დადგენილ რომელიმე ცენზს არ აკმაყოფილებს.