შინაგან საქმეთა სამინისტრომ განზრახ მკვლელობის მცდელობის ბრალდებით ერთი პირი დააკავა. მას 7-დან 15 წლამდე ვადით თავისუფლების აღკვეთა ემუქრება.

უწყების ცნობით, ბრალდებულმა მიმდინარე წლის 9 აგვისტოს, ურთიერთშელაპარაკებისას, სანადირო თოფიდან გასროლით 17 წლის დაჭრა და შემთხვევის ადგილიდან მიიმალა.

გავრცელებული ინფორმაციით, დაპირისპირების მიზეზი ძაღლების ჩხუბი გახდა. არასრულწლოვანი ძაღლს ასეირნებდა, რა დროსაც მისმა ძაღლმა სხვა ძაღლს უკბინა. ამ ყველაფერს კი სიტყვიერი დაპირისპირება მოჰყვა, რის შემდეგაც 37 წლის მამაკაცმა 17 წლის ახალგაზრდას თავის არეში იარაღიდან ესროლა.

სამართალდამცველებმა ბრალდებული მალევე დააკავეს. დანაშაულის ჩადენის იარაღი —ორლულიანი სანადირო თოფი, ნივთმტკიცებად ამოიღეს.

გამოძიება საქართველოს სისხლის სამართლის კოდექსის 19-108-ე მუხლით მიმდინარეობს, რაც განზრახ მკვლელობის მცდელობას გულისხმობს.