ქართველმა სუმოისტმა თეიმურაზ ჯუღელმა, იგივე გაგამარუმ ვიდეომიმართვა ჩაწერა და იაპონელებს საქართველოში მოგზაურობას ურჩევს.

"იაპონელო ხალხო, დილა მშვიდობის. მე ვარ ქართველი გაგამარუ. გთხოვთ, ჩამობრძანდეთ და იმოგზაუროთ ჩემს სამშობლოში. ნახოთ, თუ როგორი ლამაზი ქვეყანაა. ულამაზესი მთითა და ბარით, ზღვით და მდინარეებით, გემრიელი საჭმელებით მდიდარი ქვეყანაა საქართველო. ჩამობრძანდით ჩვენთან. პატივისცემით გაგამარუ", — თქვა გაგამარუმ.

საქართველოში ანტისაოკუპაციო აქციები #სირცხვილია მე-14 დღეა მიმდინარეობს. სამოქალაქო პროტესტი რუსი დეპუტატის სერგეი გავრილოვის საქართველოში ვიზიტმა და პარლამენტის თავმჯდომარის სკამიდან რუსულ ენაზე განცხადების გაკეთებამ გამოიწვია. შედეგად, გავრილოვმა საქართველო დატოვა, პარლამენტის თავმჯდომარე გადადგა. რუსეთმა საქართველოს "დასჯა განიზრახა" და სანქციების ბერკეტი აამოქმედა: რუსულ ავიახაზებს საქართველოში ფრენა აუკრძალა, რამდენიმე ღვინის ექსპორტიორი კომპანია დაბლოკა და აქციები "რუსოფობიად" მოიხსენია. ამის პარალელურად, დიპლომატიურმა კორპუსმა და მოქალაქეებმა ტურისტების მოზიდვის მიზნით დაიწყეს კამპანია #spendyoursummeringeorgia.

კამპანიის მიზანია მსოფლიოს მასშტაბით ტურისტებს მიაწვდინონ ხმა რუსულ ემბარგოზე და ჩვენი ტურისტული პოტენციალი გააცნონ. კამპანიას უკვე შეუერთდნენ ქართველი სპორტსმენების, მომღერლების, მსახიობების ნაწილი, დიპლომატიური კორპუსის წარმომადგენლები.