საქართველოს საპატრიარქომ არქიმანდრიტ დოროთე ყურაშვილს მღვდელმოქმედების უფლება შეუჩერა. ამის შესახებ მათ მიერ გავრცელებულ განცხადებაშია ნათქვამი.

ბრძანებაში, რომელსაც ხელს საქართველოს კათალიკოს-პატრიარქი ილია II აწერს, წერია, რომ მას მღვდელმსახურება "საეკლესიო კანონიკური ეთიკის არაერთგზისი დარღვევისათვის" შეუჩერდა.

"ბრძანება N 105

სრულიად საქართველოს საპატრიარქოსადმი

(15.12.2025)

თბილისის წმ. სამების საკათედრო ტაძრის მღვდელმსახურს, არქიმანდრიტ დოროთეს (ყურაშვილი), გაფრთხილებების მიუხედავად, საეკლესიო კანონიკური ეთიკის არაერთგზისი დარღვევისათვის, მოციქულთა 55-ე კანონის საფუძველზე, შეუჩერდეს მღვდელმოქმედების უფლება.

ილია II
სრულიად საქართველოს
კათოლიკოს-პატრიარქი", — წერია საპატრიარქოს მიერ გავრცელებულ ინფორმაციაში.

მანამდე მან განაცხადა, ის სამშაბათს, 14:00 საათზე საპატრიარქოს კომისიაზე კიდევ დაიბარეს.

"ბრალდება არის ასეთი, რომ თითქოს მე ეპისკოპოსებს, კომისიის წევრებს მივაყენე შეურაცხყოფა და ცილი დავწამე. ამიტომ, იმავე კომისიაში ვარ დაბარებული, რომელ კომისიასაც, მათი თქმით, მე ცილი დავწამე და შეურაცხყოფა მივაყენე. ასეთი რამ არცერთ კანონში არ წერია, რომ ადამიანი დაიბარო იმ კომისიაზე, რომლის მიმართ პრეტენზია აქვს. თუ მე ცილი დავწამე ამ კომისიას, ამ კომისიამ რატომ უნდა დამიბაროს. პირიქით, ამ კომისიის წევრები ჩემთან ერთად უნდა დაიბაროს სინოდმა ან სინოდალურმა კომისიამ, მაგრამ როგორც წინაზეც გითხარით, პატრიარქის მოსაყდრე შიომ, [ანდრია] ჯაღმაიძემ, [მიქაელ] ბოტკოველმა საქართველოში გააუქმეს სინოდი და სამართალი არ არსებობს. ეს უსამართლობა არის რჯულის კანონითაც", — განაცხადა არქიმანდრიტმა დოროთე ყურაშვილმა.

მიმდინარე წლის 29 ოქტომბერს მცხეთა-თბილისის ეპარქიულმა კომისიამ არქიმანდრიტი დოროთე ყურაშვილის ქვემო ბეთლემის მაცხოვრის შობის სახელობის ტაძრის წინამძღვრის მოვალეობიდან გათავისუფლება მოითხოვა.

კომისიამ ამ გადაწყვეტილების მიღების მიზეზად კომისიის უგულებელყოფა, შეურაცხყოფა და საპატრიარქოს კომისიაზ არასაპატიო მიზეზით გამოუცხადებლობა დაასახელა. ასევე, კომისიამ "დაადგინა, რომ არქიმანდრიტ დოროთეს (ყურაშვილი) მხრიდან კვლავ იკვეთება დისციპლინური და ზნეობრივი ხასიათის დარღვევები, კერძოდ ცილისმწამებლური, ასევე მღვდლისა და მონაზვნისათვის შეუფერებელი სხვა ქმედებები.

საპატრიარქოს განცხადებაში ვკითხულობთ, რომ არქიმანდრიტი მიმდინარე წლის 16 ოქტომბერსაც დაბარებული იყო მცხეთა-თბილისის ეპარქიულ კომისიაზე, თუმცა "არასაპატიო მიზეზით არ გამოცხადდა." ამის შემდეგ მან "მკაცრი გაფრთხილება მიიღო, ხოლო ახსნა-განმარტებისთვის განმეორებით დაბარებულ იქნა კომისიაზე მიმდინარე წლის 29 ოქტომბერს, რაზეც მან თავისი პირობები წამოაყენა, რომ კომისიას მხოლოდ მედიასაშუალებების თანხლებით დაესწრებოდა" — მოთხოვნაზე კომისიამ უარი განაცხადა. არქიმანდრიტი კი კვლავ არ დაესწრო სხდომას.