სოციალური სამართლიანობის ცენტრი კანონში შეტანილი ცვლილებებით, ტროტუარზე შეკრების შეზღუდვას გამოეხმაურა. ცენტრი განმარტავს, რომ "საკანონმდებლო ცვლილებები, რომლებიც კიდევ უფრო მეტად ავიწროებს მშვიდობიანი შეკრების დასაშვებ ფარგლებს, არაკონსტიტუციურია და გაუმართლებლად ერევა შეკრების თავისუფლებით დაცულ სფეროში". მათივე თქმით, აღნიშნული ცვლილებები ნათელს ხდის, რომ სახელმწიფოს მიზანი ყოველგვარი შეკრების გაუქმებაა.

"2025 წლის 8 დეკემბერს "ქართულმა ოცნებამ" შეკრების თავისუფლების შემზღუდველი კიდევ ერთი რეპრესიული საკანონმდებლო ცვლილება დააინიცირა, რომელიც რამდენიმე დღეში დაჩქარებული წესით განიხილა და 12 დეკემბერს უკვე ძალაში შევიდა. საკანონმდებლო ცვლილებები, რომლებიც კიდევ უფრო მეტად ავიწროებს მშვიდობიანი შეკრების დასაშვებ ფარგლებს, ჩვენი შეფასებით, არაკონსტიტუციურია და გაუმართლებლად ერევა შეკრების თავისუფლებით დაცულ სფეროში.

შეტანილი ცვლილებები კიდევ უფრო ნათელს ხდის, რომ სახელმწიფოს მიზანი ყოველგვარი შეკრების გაუქმებაა, შეფერხების თვითმიზნურობის მიუხედავად, რადგან თავისი ბუნებიდან გამომდინარე, საფეხმავლო მოძრაობის შეფერხება მხოლოდ და მხოლოდ ისეთ შემთხვევებშია შესაძლებელი, როდესაც ეს შეკრებილების რაოდენობიდან გამომდინარე ბუნებრივად ხდება.

სამართლის უზენაესობის თითქმის თითოეული მინიმალური მოთხოვნის დარღვევა მხოლოდ იმით შეიძლება აიხსნას, რომ სამართალი ავტოკრატიზაციის დაჩქარებულ გზაზე მყოფ საქართველოში მხოლოდ ძალის გამოყენების ხელოვნური ლეგიტიმაციის ინსტრუმენტია და აღარ ემსახურება მის თავდაპირველ მორალურ ფუნქციას — სახელმწიფოს მხრიდან ძალაუფლების თვითნებურად, მიკერძოებულად გამოყენებისგან დაიცვას მოქალაქეები (და არა პირიქით). ამ პრინციპების სისტემური, მიზანმიმართული და არაკეთილსინდისიერი დარღვევა ძირს უთხრის სახელმწიფოსა და საზოგადოებას შორის არსებულ ყოველგვარ ნდობასა და შეთანხმებას", — დაწერა სოციალური სამართლიანობის ცენტრმა.

ცნობისთვის, ოცნების საპარლამენტო უმრავლესობის ლიდერმა, ირაკლი კირცხალიამ 8 დეკემბერს უმრავლესობის სხდომის დასრულების შემდეგ ბრიფინგზე განაცხადა, რომ შეკრების მონაწილეების შსს-ს მიერ შეთავაზებულ ადგილზე შეკრების ან მანიფესტაციის ჩატარების შემთხვევაში, თუ შეკრებას მაინც იმ ადგილზე ჩაატარებენ, მონაწილეებს დაეკისრება პატიმრობა 15 დღემდე ვადით, განმეორებისას — პატიმრობა 1 წლამდე ვადით.

შეკრებამდე დემონსტრანტებმა შსს 5 დღის ვადაში უნდა გააფრთხილონ — "ოცნება" შეკრება-მანიფესტაციის შესახებ კანონს კიდევ ერთხელ ამკაცრებს