ევროკავშირი ევროპაში რუსეთის ცენტრალური ბანკის აქტივების განუსაზღვრელი ვადით გაყინვას დასთანხმდა, რაც უკრაინის რუსეთისგან თავდაცვის მიზნით ნაღდი ფულის გამოყენების დიდ დაბრკოლებას მოხსნის. ამის შესახებ ინფორმაციას Reuters ავრცელებს.

პირველი ნაბიჯი, რომელზეც ევროკავშირის მთავრობები შეთანხმდნენ, 210 მლრდ ევროს (246 მლრდ დოლარის) ღირებულების რუსული სუვერენული აქტივების იმ დროით გაყინვაა, რამდენიც საჭიროა, ყოველ ექვს თვეში ერთხელ აქტივების გაყინვის გაგრძელებაზე ხმის მიცემის ნაცვლად.

ეს გამორიცხავს რისკს, რომ უნგრეთმა და სლოვაკეთმა, რომლებსაც მოსკოვთან უკეთესი ურთიერთობები აქვთ, ვიდრე ევროკავშირის სხვა სახელმწიფოებს, გარკვეულ მომენტში უარი თქვან გაყინვის გაგრძელებაზე, რაც ევროკავშირს აიძულებს, ფული რუსეთს დაუბრუნოს.

აქტივების განუსაზღვრელი ვადით გაყინვის მიზანია ევროკავშირის გეგმის მხარდაჭერა, რომელიც გაყინული რუსული ნაღდი ფულის გამოყენებით უკრაინისთვის 165 მლრდ ევრომდე სესხის გაცემას ითვალისწინებს, რათა, 2026 და 2027 წლებში, მისი სამხედრო და სამოქალაქო ბიუჯეტის საჭიროებები დაფაროს.

უკრაინა სესხს მხოლოდ მაშინ დაფარავს, როდესაც რუსეთი კიევს ომის შედეგად მიყენებულ ზარალს გადაუხდის, რაც სესხს ფაქტობრივად გრანტს გახდის.

ევროკავშირის ლიდერები 18 დეკემბერს შეიკრიბებიან, რათა რეპარაციების სესხის დეტალებზე მუშაობა დაასრულონ და დარჩენილი პრობლემები მოაგვარონ, რაც ევროკავშირის ყველა მთავრობის მხრიდან ბელგიისთვის გარანტიების მიცემას გულისხმობს იმის შესახებ, რომ ის მარტო არ დარჩება ხარჯების გადახდაში, თუ მოსკოვის პოტენციური სარჩელი წარმატებით დასრულდება.