ქვემო ქართლის სახელმწიფო რწმუნებულის ყოფილი მოადგილე და ქართული ოცნების ქვემო ქართლის რეგიონული შტაბის ხელმძღვანელი გიორგი შინჯიკაშვილი მარნეულისა და ჰუჯაბის ეპისკოპოსს, მეუფე გიორგი ჯამდელიანს ცილისწამებაში ადანაშაულებს და სასამართლოში უჩივის. ამის შესახებ ინფორმაციას "რადიო მარნეული" ავრცელებს.

12 დეკემბერს პირველი სასამართლო სხდომა ბოლნისის რაიონულ სასამართლოში გაიმართა.

შეგახსენებთ, რომ მიმდინარე წლის 8 ივნისს მეუფე გიორგი ჯამდელიანმა ქადაგებისას განაცხადა, რომ შინჯიკაშვილი მის მკვლელობას გეგმავდა.

"შინჯიკაშვილმა შეიტანა საჩივარი ჩემს წინააღმდეგ, რომ თითქოს მისი ღირსება და პატივი შეილახა. საეკლესიო, კანონიკურ სასამართლოს არ მინდოდა გავცდენოდით და გამოდის, რომ იძულებულს მხდის მხარე, მიჩივის სასამართლოში, რომ ჩვენ სასამართლოს წარვუდგინოთ მტკიცებულებები და აქეთ დავიცვათ თავი. მტკიცებულებები არსებობს იმდენი, რამაც გამოუტანა მას განჩინება," — განაცხადა მეუფემ "ფორმულასთან" საუბრისას.

გიორგი შინჯიკაშვილი დღევანდელ პროცესს არ დაესწრო. შინჯიკაშვილის ადვოკატმა ფორმულასთან საუბრისას განაცხადა, რომ ბრალდებულმა თავისი განცხადებების სიმართლის დამადასტურებელი მტკიცებულებები ვერ წარადგინა.

"გიორგი ჯამდელიანს დღეს და შემდეგ პროცესებზეც მოუწევს იმის მტკიცება, რომ ქადაგებაში ნათქვამი ფაქტები არის სწორი. დღეს არც ერთი მტკიცებულება არ არის წარმოდგენილი და დაველოდებით შემდეგ სხდომას და ალბათ ვერ წარმოადგენს და ვერ დაადასტურებს, რომ რაშიც ბრალს დებს გიორგი შინჯიკაშვილს არის ნამდვილი," — განაცხადა ადვოკატმა.

შეგახსენებთ, რომ 10 ივნისს მარნეულისა და ჰუჯაბის ეპარქიამ გამოაქვეყნა საეპისკოპოსო სასამართლოს ოქმი, სადაც აღნიშნულია, რომ მარნეულისა და ჰუჯაბის ეპარქიის წინამძღოლის, გიორგი ჯამდელიანის მკვლელობის მცდელობაში ბრალდებული გ.შ. დამნაშავედაა ცნობილი.
საეპისკოპოსო სასამართლოს ოქმის მიხედვით, ბრალმდებელი და მომჩივანი მონაზონი თ.კ.-ა, ბრალდებული — "საერო პირი, მარნეულისა და ჰუჯაბის ეპარქიის საზღვრებში მოქმედი ბატონი გ.შ."

საეპისკოპოსო სასამართლოს განჩინებით, "ბრალდებულ ბატონ გ.შ-ს გულწრფელ სინანულამდე აეკრძალა ზიარება", ხოლო სინანულის შემთხვევაში 20 წლით უზიარებლობის განაჩენი გამოუტანეს.

საეპისკოპოსო სასამართლოს ოქმი 6 ივნისითაა დათარიღებული და მას ხელს მარნეულისა და ჰუჯაბის ეპისკოპოსი გიორგი (ჯამდელიანი) აწერს.

საქმე ეხება 8 ივნისს ეპისკოპოსის ქადაგებას. მისი თქმით, მთავრობის მოქმედ წევრს, კონკრეტულად უშიშროების უწყების წარმომადგენელს, მონაზონი ჰყავდა "დავერბოვკრებული" და მისი მეშვეობით წამლავდა.