ესპანური გაზეთი "მარკა" UFC-ის ჩემპიონის, ილია თოფურიას განცხადებას ავრცელებს. თოფურიას განცხადებით, მას "ოჯახური ძალადობის ცრუ ბრალდებით" აშანტაჟებენ და ამის დამადასტურებელი მტკიცებულებებიც აქვს. ცნობისთვის, ილია თოფურიას განქორწინებასთან დაკავშირებით სასამართლო დავა აქვს.

"როგორც იცით, ბოლო კვირების განმავლობაში დროებით მომიწია ტიტულის დაცვაზე უარის თქმა. რაც, როგორც წარმოგიდგენიათ, ადვილი გადაწყვეტილება არ ყოფილა. მაგრამ როდესაც ცხოვრება გიქმნის სიტუაციებს, რომლებიც საფრთხეს უქმნის სიმშვიდეს, შენს ოჯახს და რეპუტაციას, დგება დრო, როდესაც უნდა გადადგა ნაბიჯი წინ.

ბოლო რამდენიმე თვის განმავლობაში მე განვიცადე აუტანელი სიტუაციები და ზეწოლა მუქარით, რომ თუ ფულს არ გადავიხდიდი, გავრცელდებოდა უსაფუძვლო ბრალდებები [ჩემი მხრიდან] არასათანადო მოპყრობის შესახებ, მაგრამ სიმართლეს მხოლოდ ერთი გზა აქვს: ფაქტები.

ყველა მათგანი [მუქარები] იდეალურად არის დოკუმენტირებული — აუდიოჩანაწერები, შეტყობინებები, ჩვენებები და ვიდეოები — და ხელმისაწვდომია სასამართლოებისთვის, რათა იურიდიულად გააგრძელონ არა მხოლოდ გამოძალვის მცდელობის, არამედ მტკიცებულებების გაყალბების და ქურდობის შემთხვევების გამოძიებაც კი, მიღებულ მუქარებთან ერთად.

ვცადე ჩუმად ვყოფილიყავი, რათა დამეცვა ჩემი შვილები, რომლებიც ჩემი ცხოვრების საყრდენები არიან, მაგრამ მივხვდი, რომ ჩუმად ყოფნა აღარ ნიშნავს დაცვას: ეს ტყუილს ზრდის საშუალებას აძლევს.

ბევრმა ადამიანმა გაიარა მსგავსი სიტუაციები და სამართალმა, ადრე თუ გვიან, ყოველთვის გაიმარჯვა. დღეს ჩემი ჯერია, წინ დავდგე და ვიყო მაგალითი იმისა, რომ არავინ უნდა დაემორჩილოს ზეწოლას, მანიპულაციას ან შიშს. ვინც მიცნობს, იცის, რომ არასდროს გამომიყენებია ძალადობა ვინმეს მიმართ და რომ ჩემი ღირებულებები ყოველთვის იყო პატივისცემა, დისციპლინა და პატიოსნება.

დღეს ჩემი ჯერია, წინ წავიდე და ვიყო მაგალითი იმისა, რომ არავინ არ უნდა დანებდეს ზეწოლას, მანიპულირებას ან შიშს.

ამ ნაბიჯს ვდგამ ჩემი ოჯახისთვის, საკუთარი თავისთვის და ყველა მათთვის, ვისაც სჭირდება ნახოს, რომ სიმართლე ქმედებებით არის დაცული. მე სრული რწმენა მაქვს მართლმსაჯულების სისტემის მიმართ და ყველაფერს, რაც განმიცდია, მის ხელში ვაბარებ.

როგორც გესმით, ჩემი შვილებისა და სამართლებრივი პროცესის პატივისცემის გამო, დამატებით განცხადებებს აღარ გავაკეთებ. უბრალოდ გთხოვთ, რომ ამ რთულ დროს არ იყოს სპეკულაციები და პატივი ეცით ჩემი ოჯახის პირად ცხოვრებას, ეს ისაა რასაც ყოველთვის აკეთებდით და რისთვისაც ღრმად მადლიერი ვარ.
ჩემს სიმართლეს არ სჭირდება ყვირილი; ის უბრალოდ უნდა მოისმინონ," — ვკითხულობთ თოფურიას განცხადებაში. (თარგმანი ნეტგაზეთი)

ესპანეთის სახელით მოასპარეზე ილია თოფურია ქართველი შერეული საბრძოლო ხელოვნების (MMA) მებრძოლია. 2024 წლის 18 თებერვალს, ალექსანდრ ვოლკანოვსკის დამარცხების შემდეგ, ილია თოფურია გახდა UFC-ის ქვემსუბუქი წონითი დივიზიონის ჩემპიონი, ხოლო 2025 წლის 28 ივნისს, ჩარლზ ოლივეირას დამარცხების შემდეგ, UFC-ის მსუბუქი წონითი დივიზიონის ჩემპიონის წოდებაც მოიპოვა. ილია თოფურია პირველი მებრძოლია ისტორიაში, რომელმაც UFC-ის ორი წონითი დივიზიონის ჩემპიონის ქამარი ისე მოიპოვა, რომ ერთხელაც არ დამარცხებულა.