14 დეკემბერს ადვოკატთა ასოციაციის ახალი თავმჯდომარის არჩევნები გაიმართა, რომელშიც 2700-ზე მეტმა ადვოკატმა მიიღო მონაწილეობა. კენჭისყრის შედეგად ახალი თავმჯდომარე ვერ აირჩიეს. ხმათა უმრავლესობა 2-მა ადვოკატმა, ირაკლი ყანდაშვილმა და ირაკლი ჩომახაშვილმა მოაგროვეს. მეორე ტურში გადასულმა ირაკლი ყანდაშვილმა 1283 ხმა მიიღო, ხოლო ირაკლი ჩომახაშვილმა — 1109. ვერც ერთმა მათგანმა ვერ მოაგროვა ხმათა 50%-ზე + 1 ხმა, შესაბამისად, მეორე ტური არჩევნებიდან არაუგვიანეს 14 დღის ვადაში უნდა ჩატარდეს.

2025 წლის არჩევნებში ასოციაციის თავმჯდომარეობის მსურველი 6 კანდიდატი იყო: ნიკოლოზ კვანტრიშვილი, გიორგი მარიამიძე, მუხრანი ღურწკაია, ირაკლი ყანდაშვილი, ირაკლი ჩომახაშვილი, მანუჩარ ჭუმბურიძე.

ირაკლი ჩომახაშვილის თქმით, მან კოალიციურად უფრო მეტი ხმა მიიღო.

"ჩვენ კოალიციურად უფრო მეტი ხმა ავიღეთ, ვიდრე ირაკლი ყანდაშვილმა. ირაკლი ყანდაშვილი მისწრებს 174 ხმით, თუმცა დაინიშნა მეორე ტური. იმ პირობებში, როდესაც უამრავი დისკრედიტაცია და ტყუილი ვრცელდებოდა ჩემზე, მადლობა მინდა გადავუხადო ყველა ადვოკატს, ყველა ჩემს კოლეგას, რომელმაც მხარი დამიჭირა და არჩევნებში მონაწილეობა მიიღო. მეორე ტური არის წინ და მეორე ტურში ყველა ერთად გავიმარჯვებთ", — განაცხადა ირაკლი ჩომახაშვილმა.

ირაკლი ყანდაშვილმა ირაკლი ჩომახაშვილს მეორე ტურში გასვლა მიულოცა. მისი თქმით, არჩევნები ისე ჩატარდა, როგორც ადვოკატთა ასოციაციას შეეფერება.

"არჩევნებში ადვოკატებმა ჩვენი პოზიცია დავაფიქსირეთ. ამ ეტაპზე თავმჯდომარეობასთან დაკავშირებით მეორე ტური არის. რაც შეეხება, საბჭოს, აღმასრულებელ და ეთიკის კომისიას, იქ უკვე შედეგები ცნობილია. მოხარული ვარ, რომ ჩემი თანამოაზრეების უმრავლესობა არის ამ ორგანოებში, თუმცა ჩვენ ყველანი ერთი დიდი ოჯახის წევრები ვართ. ვულოცავ მეორე ადგილზე გასულ კანდიდატს, მეორე ტური დაინიშნა. როგორც ადვოკატთა ასოციაციას შეეფერება, ჩატარდება მეორე ტური და დაველოდოთ საბოლოო გადაწყვეტილებას", — განაცხადა ირაკლი ყანდაშვილმა (კომენტარებს IPN ავრცელებს).

14 დეკემბერს გამართულ კრებაზე აირჩიეს აღმასრულებელი საბჭოს, ეთიკის კომისიისა და სარევიზიო კომისიის წევრებიც.