ავსტრალიაში, ბონდის სანაპიროზე ებრაული დღესასწაულ ხანუკას დროს, ორმა პირმა მოქალაქეებს ცეცხლა გაუხსნა. ბოლო მონაცემებით, შემთხვევის შედეგად 15 პირია გარდაცვლილი, დაშავდა კიდევ 42.

CNN-ის ინფორმაციით, ყველაზე ახალგაზრდა გარდაცვლილი 10 წლის გოგონაა, რომელიც ოჯახთან ერთად დღესასწაულს აღნიშნავდა. ერთ-ერთი გარდაცვლილი, რომელიც ჰოლოკოსტს გადაურჩა, მას შემდეგ გარდაიცვალა, რაც მომხდარი სროლისას მეუღლეს გადაეფარა.

ერთ-ერთი თავდამსხმელი 43 წლის აჰმედ ალ აჰმედმა განაიარაღა — წინააღმდეგობის გაწევის დროს ის ორჯერ დაიჭრა, მაგრამ მის ჯანმრთელობას საფრთხე არ ემუქრება. პოლიციის ინფორმაციით, თავდამსხმელები მამა-შვილი იყვნენ — სამართალდამცავებმა მამის ლიკვიდაცია მოახერხეს, ხოლო შვილი ჯანმრთელობის მძიმე დაზიანებებით კლინიკაში იმყოფება.

ავსტრალიას მსოფლიოში ერთ-ერთი ყველაზე მკაცრი იარაღის შესახებ კანონმდებლობა აქვს, თუმცა მომხდარი მასობრივი სროლის შემდეგ, შესაძლოა, კანონმდებლობა კიდევ უფრო გაამკაცრონ.

ავსტრალიის პრემიერმინისტრმა, ენტონი ალბანეზემ ჟურნალისტებს განუცხადა, რომ მინისტრთა კაბინეტი "იარაღის შესახებ კანონმდებლობის გამკაცრებაზე" იმსჯელებს, მათ შორის — ფიზიკური პირებისთვის გამოყენებული ან ლიცენზირებული იარაღის რაოდენობის შეზღუდვაზეც.

"თუ საჭირო იქნება კიდევ უფრო გამკაცრება, თუ არსებობს რაიმე, რაც შეგვიძლია გავაკეთოთ, ამისთვის ნამდვილად მზად ვარ," — განაცხადა ალბანეზემ.

ერთ-ერთი თავდამსხმელის ფოტო

ერთ-ერთი თავდამსხმელის ფოტო

ფოტო: Daily Mail

გავრცელებული ინფორმაციით, თავდამსხმელ მამას რეკრეაციული ნადირობის იარაღის ლიცენზია ჰქონდა და იარაღის კლუბის წევრიც იყო, ხოლო თავდასხმამდე ცოტა ხნით ადრე, ქვეყნის უსაფრთხოების სააგენტომ, ASIO-მ შვილი შეამოწმა და საზოგადოებისთვის უსაფრთხო პირად გამოაცხადა.