15 დეკემბერს, გაერთიანებული სამეფოს საიდუმლო სადაზვერვო სამსახურის ხელმძღვანელი, ბლეიზ მეტრეველი, თანამდებობაზე დანიშვნის შემდეგ, კომენტარს პირველად გააკეთებს. The Guardian-ის ინფორმაციით, მეტრეველი რუსეთის მხარეს გააფრთხილებს, რომ დიდი ბრიტანეთი უკრაინის მხარდაჭერას არ შეწყვეტს და "ფრონტის ხაზი ყველგანაა".

"პუტინს ეჭვიც არ შეეპაროს — ბრიტანეთის მხარდაჭერა გრძელვადიანია. ზეწოლა, რომელსაც უკრაინის სახელით ვახორციელებთ, გაგრძელდება", — წერია The Guardian-ის მიერ გავრცელებულ კომენტარში.

გამოცემის ინფორმაციით, მეტრეველი რუსეთის მხრიდან სისტემატურ ქაოსზე ისაუბრებს და დასძენს, რომ სანამ ვლადიმერ პუტინი იძულებული არ გახდება, ის მანამდე რიტორიკას არ შეცვლის.

"ქაოსის ექსპორტი რუსეთის საერთაშორისო ჩართულობის მახასიათებელია და არა შეცდომა, და ჩვენ მზად უნდა ვიყოთ, რომ ეს გაგრძელდება მანამ, სანამ პუტინი იძულებული არ გახდება, შეცვალოს თავისი გათვლები."

მეტრეველის განცხადებით, 21-ე საუკუნის მთავარი გამოწვევა არა ძლიერი ტექნოლოგიები, არამედ ისაა, ვინ უძღვება საქმეს საქმეს "ყველაზე მეტი სიბრძნით".

"21-ე საუკუნის გადამწყვეტი გამოწვევა არ არის უბრალოდ ის, თუ ვინ ფლობს ყველაზე ძლიერ ტექნოლოგიებს, არამედ ის, თუ ვინ უძღვება მათ ყველაზე მეტი სიბრძნით. ჩვენი უსაფრთხოება, კეთილდღეობა და კაცობრიობა ამაზეა დამოკიდებული".

47 წლის ბლეიზ მეტრეველი პირველი ქალია, რომელიც ბრიტანეთის საგარეო დაზვერვას ხელმძღვანელობს. ის ამ თანამდებობაზე 2025 წლის ივნისში დაინიშნა, ამ პოსტზე მან სერ რიჩარდ მური შეცვალა. მანამდე მეტრეველი სხვა დირექტორის დონის თანამდებობებს იკავებდა ბრიტანეთის სადაზვერვო სამსახურში (MI6), შიდა უსაფრთხოებისა და კონტრდაზვერვის სააგენტო MI5-ში.