ზღვის დონიდან 3014 მეტრ სიმაღლეზე მდებარე ალპურმა ქოხმა — ალტიჰატმა და ახალგაზრდული ტანსაცმლის ბრენდმა, Reckless-მა საერთო, თემატური ბალაკლავა გამოუშვეს. ამ აქსესუარით ორმა სრულიად განსხვავებულმა, მაგრამ ერთი სულისკვეთების ბრენდმა, მთის თავისუფლება და ურბანული ენერგია გააერთიანა.

დიზაინერებმა ანკა ქოიავამ, ლიზა ყაჯრიშვილმა და მასო მწარიაშვილმა ,ალტიჰატიდან გადაღებული მთის პეიზაჟები გრაფიკულ გამოსახულებად აქციეს. ტექსტები კი, რომლებიც ბალაკლავაზე დაიტანეს, Reckless-ის მკაფიო მესიჯსა და ალტიჰატის ხასიათს აერთიანებს.

“რადგან ქუჩის სტილი და სამთო სპეციფიკა ძალიან განსხვავებულია, ამიტომ ამ აქსესუარზე შევჯერდით. ეფექტურიცაა და მოძრაობაშიც ხელს არ გიშლის“. — ამბობენ დიზაინერები.

ეს კოლაბორაცია კომერციული ინტერესის გამო არც ერთ ბრენდს არ დაუწყია. Reckless -ის აღმასრულებელი დირექტორი, თორნიკე აფრიდონიძე ამბობს, რომ ზოგადად, ისინი სხვა კომპანიებთან თანამშრომლობას სიფრთხილით ეკიდებიან. ალტიჰატის შემთხვევაში კი, ძალიან მალე მიხვდნენ, რომ გემოვნება, ხედვები და შესრულების ხარისხი ერთმანეთს ემთხვეოდა.

“ორივე ბრენდი თავად ქმნის თემს და ე.წ. community builder-ია. ერთი — ურბანულ გარემოში, ახალგაზრდებთანაა დაკავშირებული, ალტიჰატი კი, ამ გარემოსგან შორს, მაგრამ, ზუსტად თავისუფლების იდეასა და ღირებულებებს იზიარებს. გამორჩეული დიზაინით შექმნილ აქსესუარზეც ეს მთავარი მესიჯებია დატანილი“. — ამბობს თორნიკე.

“ვფიქრობ, ამ კოლაბორაციითა და ექსკლუზიური პროდუქტის შექმნით, ბიზნეს დაჯილდოების გამარჯვებულმა ორმა კომპანიამ ახალი ეტაპი დავიწყეთ. გვინდა, მაგალითის მიმცემი გავხდეთ სხვებისთვის. ჩვენი მიდგომა შთაგონებულია ნიკო ნიკოლაძის სიტყვებით: შრომა, პატიოსნება და სწავლა.“ — ამბობს ალტიჰატის დამფუძნებელი, ნიკოლოზ ალავიძე.

კოლაბორაციის შესახებ პრეზენტაცია უახლოეს მომავალშია დაგეგმილი. ეს თანამშრომლობა ზუსტად პასუხობს თიბისი ბიზნეს დაჯილდოების მთავარ გზავნილს — წარმატება გზაშია, მთავარია გჯეროდეს!