ჩვენს მეზობლებს ჯერ არ სურთ, რომ [ჩეჩნეთთან დამაკავშირებელმა] გზამ საქართველოზე გაიაროს, განაცხადა ჩეჩნეთის ლიდერმა რამზან კადიროვმა 14 დეკემბერს პირდაპირ ეთერში, იტუმ-კალი (ჩეჩნეთი) — შატილის (საქართველო) გზატკეცილის მშენებლობასთან დაკავშირებით დასმულ კითხვაზე პასუხის გაცემისას.

"სინამდვილეში, საქართველო ჩვენთვის არახელსაყრელი აღმოჩნდა, მიუხედავად იმისა, რომ ჩვენ ხელი მოვაწერეთ დოკუმენტებს და ყველაფერი გავაკეთეთ. სამწუხაროდ, ჩვენი მეზობლები ჯერ არ არიან მზად, [ჩეჩნეთთან დამაკავშირებელმა] გზამ საქართველოზე გაიაროს", — თქვა კადიროვმა.

რუსული მედია წერს, რომ ჩეჩნეთში პერიოდულად ჩნდებოდა საქართველოზე სახმელეთო გზის მშენებლობის საკითხი, მაგრამ საუბრის იქით საქმე წინ არ წასულა. იტუმ-კალი-შატილის გზატკეცილის გაყვანა იგეგმებოდა არგუნის ხეობის ზემო ნაწილის გასწვრივ, იტუმ-კალის რეგიონული ცენტრიდან რუსეთ-საქართველოს საზღვრამდე. გზის მშენებლობა 1997 წელს დაიწყო, მაგრამ სამუშაოები ორი წლის შემდეგ საქართველოს პოზიციის გამო შეჩერდა. 2022 წლის მარტში, საქართველოს რეგიონული განვითარებისა და ინფრასტრუქტურის სამინისტრომ განაცხადა, რომ თბილისს არასდროს განუხილავს და არც განიხილავს ჩეჩნეთის გზის მშენებლობას.