ქართული ოცნების ყოფილი პრემიერმინისტრის, ირაკლი ღარიბაშვილის სასამართლო პროცესი 16 დეკემბრის მაგივრად, 12 თებერვლამდე გადაიდო. ღარიბაშვილის ადვოკატის, ამირან გიგუაშვილის განცხადებით, სხდომა მას შემდეგ გადაიდო, რაც პროკურატურამ დამატებითი დრო მოითხოვა მტკიცებულებების მოსაპოვებლად.

"გახანგრძლივდა ვადა 12 თებერვლამდე, გამოძიების ინიციატივით. პროკურატურამ მიმართა შესაბამისი შუამდგომლობით სასამართლოს და მოითხოვა გარკვეული საგამოძიებო მოქმედებების ჩატარების უზრუნველყოფის მიზნით დამატებითი დროის გამოყოფა. მინდა გითხრათ, რომ საპროცესო ნორმით რეგულირდება ეს საკითხი და ამის უფლება ბრალდების მხარეს აქვს და სასამართლოს შეუძლია გარკვეული გარემოებების არსებობის შემთხვევაში დააკმაყოფილოს ასეთი შუამდგომლობა.

ბრალის წარდგენისთვის არსებული მტკიცებულებები საქმეში არსებობდა და ამის საფუძველზე პროკურატურის შუამდგომლობით წარედგინა ბრალდება ბატონ ირაკლი ღარიბაშვილს. მაგრამ შემდგომი ეტაპი არის გამოძიება, როდესაც უნდა განაჩენი დადგეს, შესაბამისად, როგორც ჩანს, მიიჩნია პროკურატურამ, რომ დამატებითი დრო ესაჭიროებოდა კიდევ გარკვეული საგამოძიებო მოქმედებების ჩასატარებლად, ჩვენ ვერ შევალთ ამ კომპეტენციაში, ეს არის ამ შემთხვევაში ბრალდების მხარის პრეროგატივა, ვნახოთ რა მტკიცებულებებს მოიპოვებენ და წარმოადგენენ და შესაბამისად, ამის შემდეგ გაგრძელდება სასამართლო განხილვების ეტაპი.

ბატონი ირაკლი ღარიბაშვილი ეთანხმება ბრალს, როგორც საზოგადოებისთვის არის ცნობილი, ამიტომაც ჩვენ ამ ნაწილში ბრალდების მხარის — გააგრძელებს ვადას, დანიშნავს გარკვეულ საგამოძიებო მოქმედებას თუ სხვა რაიმე პროცესუალურ ღონისძიებას გამოიყენებს, არ შევდივართ სიღრმისეულად და ველოდებით, რა მტკიცებულებები დაიდება საბოლოოდ," — განაცხადა ადვოკატმა ტვ პირველთან საუბრისას.

შეგახსენებთ, 24 ოქტომბერს მოსამართლე ეკა ბარბაქაძემ ყოფილ თავდაცვის მინისტრსა და პრემიერმინისტრს, ირაკლი ღარიბაშვილს აღკვეთის ღონისძიების სახით 1-მილიონიანი გირაო შეუფარდა. სასამართლომ ასევე დააკმაყოფილა პროკურატურის მოთხოვნა ირაკლი ღარიბაშვილისთვის პასპორტის ჩამორთმევასა და ქვეყნის ფარგლებს გარეთ გასვლის აკრძალვაზე.

გენპროკურორმა, გიორგი გვარაკიძემ ბრიფინგზე თქვა, რომ ღარიბაშვილს ბრალი სსკ-ის 194 მუხლის მე-3 ნაწილი "გ" ქვეპუნქტით წარედგინა, რაც გულისხმობს უკანონო შემოსავლის ლეგალიზაციას, რასაც თან ახლავს განსაკუთრებით დიდი ოდენობით შემოსავლის მიღება.