თურქეთმა ამერიკას ფეტულა გიულენის დაპატიმრების ოფიციალური მოთხოვნით მიმართა. ინფორმაციას ამის შესახებ Al Jazeera ავრცელებს.

თურქეთის მთავრობა ბრალს დებს ფეტულა გიულენს სახელმწიფო გადატრიალების მოწყობის მცდელობაში, რომელსაც 271 ადამიანის სიცოცხლე ემსხვერპლა. ოფიციალურ ვაშინგტონს ჯერ საპასუხო განცხადება არ გაუკეთებია.

გასული თვის ბოლოს, ანკარას, მოლაპარაკების და ურთიერთობების დარეგულირების მიზნით აშშ-ს ვიცე-პრეზიდენტი ჯო ბაიდენი და სხვა ოფიციალური პირები ეწვივნენ.

ორ ქვეყანას შორის ურთიერთობა მას შემდეგ დაიძაბა, რაც პრეზიდენტმა ერდოღანმა ამერიკას გიულენის ექსტრადირების მოთხოვნით მიმართა. აღნიშნული მოთხოვნა თურქეთს ქვეყანაში 15 ივლისს მომხდარი ამბოხის გამო არ გაუგზავნია და განმარტა, რომ ეს ქმედება გიულენის მიმართ თურქეთის მხრიდან უფრო ადრე წაყენებულ ბრალდებებს ეხებოდა, რაზეც ოფიციალურმა ვაშინგტონმა ბრალდების დამადასტურებელი საბუთები მოითხოვა.

მოგვიანებით ოფიციალურმა თურქეთმა განაცხადა: იმ შემთხვევაში თუ ამერიკის შეერთებული შტატები ერდოღანის მიერ სახელმწიფო გადატრიალების მცდელობაში დადანაშაულებულ ფეტულა გიულენს თურქეთს არ გადასცემს, ეს უკანასკნელი აშშ-სთან "მეგობრობის საკითხის გადახედავს". რის შემდეგაც თურქეთმა აშშ-ში მცხოვრები გიულენის დაკავების ორდერი გასცა.

აშშ-ს ოფიციალური პირების განცხადებით ერდოღანის შეფასებები ორ სტრატეგიულ პარტნიორ ქვეყანას შორის ურთიერთობას ძაბავდა და სანამ თურქეთი მათ გიულენის ბრალეულობის დამამტკიცებელ დოკუმენტებს არ გადასცემდა, მის წინააღმდეგ მოქმედებას ვერ დაიწყებდნენ. თავად გიულენი ბრალს არ აღიარებდა.

ბაიდენმა ანკარაში ვიზიტის შემდეგ განაცხადა, რომ ამერიკას არ ჰქონდა არანაირი ინტერესი ხელი დაეფარებინა ადამიანისთვის, რომელიც პარტნიორ ქვეყანაში არეულობას გეგმავდა, მაგრამ ისინი ვალდებულები იყვნენ დაეცვათ კანონი. შეხვედრის შემდეგ ოფიციალურმა პირებმა აღნიშნეს, რომ თურქეთის მიერ გიულენის ექსტრადირების მოთხოვნის პროცესმა პროგრესი განიცადა.