აფხაზეთის ე.წ. მომავალ პრეზიდენტის, ბადრა გუნბას ინაუგურაცია სოხუმში ჩატარდა. ცერემონიას ესწრებოდნენ რუსეთის, ე.წ. სამხრეთ ოსეთის, ნიკარაგუის, ვენესუელისა და დნესტრისპირეთის წარმომადგენლები, თუმცა, არ ესწრებოდნენ დელეგაციები ნაურუდან და სირიიდან, რომელთაც ასევე აღიარებული აქვთ აფხაზეთის დამოუკიდებლობა.

ე.წ. ინაუგურაციაზე დამსწრეებს შორის იყვნენ ოკუპირებული აფხაზეთის ე.წ. ყოფილი პრეზიდენტი ასლან ბჟანია (რომელიც 2024 წლის ნოემბერში აფხაზეთში მიმდინარე მასობრივი პროტესტის ფონზე გადადგა) და ოპოზიციის ლიდერი ადგურ არძინბა, რომელიც გუნბამ ვადამდელი საპრეზიდენტო არჩევნების პირველ და მეორე ტურში დაამარცხა.

ბადრა გუნბა ცერემონიაზე მოკლე მიმართვით წარსდგა, ისაუბრა აფხაზეთის ისტორიაზე, რუსეთთან თანამშრომლობის მნიშვნელობასა და აფხაზეთის წარსული ლიდერების სიდიადეზე.

მან ასევე ისაუბრა დაძაბულ საარჩევნო გარემოზე, თუმცა თქვა, რომ შეძლეს და შეინარჩუნეს ქვეყანაში სტაბილურობა, უზრუნველყვეს სიტუაციის სამართლებრივ ჩარჩოებში მართვა და საშუალება მისცეს მოქალაქეებს, ესარგებლათ თავიანთი კონსტიტუციური უფლებით:

"დარწმუნებული ვარ, რომ მიუხედავად მოქალაქეთა პოლიტიკური გემოვნებისა, ყველას გვაღელვებს და გვაერთიანებს ერთი — აფხაზეთის, როგორც დამოუკიდებელი ქვეყნის მომავალი", — თქვა გუნბამ.

თავის სიტყვით მიმართვაში, ე.წ. პრეზიდენტმა აღნიშნა თავისი ერთგულება რუსეთისადმი და გამოხატა მადლიერება მოსკოვის მხარდაჭერის მიმართ:

"რუსეთთან სამხედრო, ეკონომიკური, პოლიტიკური და ჰუმანიტარული თანამშრომლობა აფხაზეთის დაცულობას განაპირობებს, ქმნის შესაბამის გარემოს ადამიანების განვითარებისთვის, ზრდის კეთილდღეობას და აუმჯობესებს აფხაზთა განათლების დონეს", — აღნიშნა გუნბამ.

მან ასევე პერსონალური მადლობა გადაუხადა რუსეთის პრეზიდენტ ვლადიმერ პუტინს და რუსეთის სრულმასშტაბიან ომს უკრაინაში მხარდაჭერა გამოუცხადა:

"ჩვენი მებრძოლები რუს ძმებთან ერთად ფრონტზე მხარდამხარ იბრძვიან. ეჭვიც არ გვეპარება, რომ ომი დასახულ მიზნებს მიაღწევს."

სიტყვის ბოლოს გუნბამ განაცხადა:

"მინდა კიდევ ერთხელ დაგარწმუნოთ: ძალაუფლება, რომელიც კონსტიტუციითა და ადამიანების ნებით მერგო, მიმართული იქნება ქვეყნის მსახურებისკენ, მისი სუვერენიტეტისა და დამოუკიდებლობის დაცვისკენ, მოქალაქეთა ცხოვრების ხარისხის გაუმჯობესებისა და ეკონომიკური განვითარებისკენ".

ცერემონიაზე სიტყვით გამოვიდა პუტინის ადმინისტრაციის უფროსის პირველი მოადგილე სერგეი კირიენკოც. მან გუნბას პრეზიდენტობა მიულოცა, შეაქო აფხაზეთისა და რუსეთის თანამშრომლობა და განაცხადა, რომ გუნბას თანამდებობაზე ყოფნა ორ ქვეყანას შორის კავშირს მხოლოდ გააუმჯობესებს.

ასევე, კირიენკომ პუტინის მოწვევა გადასცა გუნბას მოსკოვში, 9 მაისის ღონისძიებაზე დასაწრებად.

გუნბას ე.წ. ინაუგურაციას ესწრებოდა ე.წ. სამხრეთ ოსეთის პრეზიდენტი ალან გაგლოევიც, რომელმაც თავის სიტყვაში ისაუბრა აფხაზეთისა და ე.წ. სამხრეთ ოსეთის 20-წლიანი თანამეგობრობის შესახებ და იმედი გამოთქვა ეკონომიკური, კულტურული, სამეცნიერო, საგანმანათლებო და ტურისტული ურთიერთობების უფრო გამყარებაზე.

შეგახსენებთ, რომ ე.წ. ვადამდელი საპრეზიდენტო არჩევნები აფხაზეთში 2025 წლის 1 მარტს ჩატარდა, ბადრა გუნბამ ხმების 54,73%-ით დაამარცხა პრეზიდენტობის მეორე კანდიდატი ადგურ არძინბა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.