კოალიცია ცვლილებებისთვის წევრი გელა ხასაია, რომელიც 31 მარტს პარლამენტის მიმდებარე ტერიტორიაზე დააკავეს და დროებითი მოთავსების იზოლატორიდან დღეს გათავისუფლდა, საკუთარი დაკავების დეტალებზე ტვ პირველთან საუბრობს და აღნიშნავს, რომ პირველად მისი დაკავების მრავალჯერად გამოცდილებებს შორის, იზოლატორში ე.წ. შესახლებისას ის სრულად არ გააშიშვლეს.

"შუშებიანი შენობიდან გადამიყვანეს იზოლატორში, საინტერესო ამ ამბავში ის იყო, რომ ჩემი ძალიან ბევრი დაკავებიდან, ეს იყო ერთადერთი შემთხვევა, როცა მთლიანად არ გამაშიშვლეს, და ეს არის ელენე ხოშტარიას მიერ ხმამაღლა გაცხადებული ამბავი და ალბათ ეს გაითვალისწინეს და აღარ ქნეს ეგრე. ეს იყო დადებითი რამ, ამ დაკავებიდან" - ამბობს გელა ხასაია.

ელენე ხოშტარიამ რამდენიმე დღის წინ გააკრიტიკა იზოლატორში გაშიშვლების პრაქტიკა და საკუთარი ძალადობრივად გაშიშვლების ისტორია გაასაჯაროვა, რომელსაც უფლებადამცველი ორგანიზაციებისა და საზოგადოების მწვავე კრიტიკა მოჰყვა. არასამთავრობო ორგანიზაციებმა ღირსებისშემლახველი და დამამცირებელი მოპყრობა უწოდეს ელენე ხოშტარიას მიმართ განხორციელებულ ქმედებებს და სპეციალურ საგამოძიებო სამსახურს გამოძიებისკენ მოუწოდეს.