საგარეო საქმეთა და უსაფრთხოების საკითხებში ევროკავშირის უმაღლესმა წარმომადგენელმა და ევროკომისიის ვიცე-პრეზიდენტმა კაია კალასმა და გაფართოების საკითხებში ევროკომისარმა, მარტა კოსიმ საქართველოსთან დაკავშირებით ერთობლივი განცხადება გაავრცელეს.

განცხადებაში ვკითხულობთ, რომ "უცხოეთის აგენტთა რეგისტრაციის შესახებ" და "მაუწყებლობის შესახებ" კანონები საქართველოს ხელისუფლებას დამატებით შესაძლებლობას აძლევს ოპოზიციის დათრგუნვისა და რეპრესიული პოლიტიკის გამკაცრებისთვის.

განცხადებაში კაია კალასი და მარტა კოსი ხელისუფლებას მოუწოდებენ, რომ აიღოს რეალური და უპირობო ვალდებულება ევროკავშირის გზაზე დასაბრუნებლად.

"პარლამენტის მიერ საზოგადოებრივი კონსულტაციების გარეშე მიღებული ახალი კანონმდებლობა, მათ შორის "უცხოეთის აგენტთა რეგისტრაციის შესახებ" კანონი და "მაუწყებლობის შესახებ" კანონი, საქართველოს ხელისუფლებას დამატებით შესაძლებლობას აძლევს ოპოზიციის დათრგუნვისთვის და რეპრესიული პოლიტიკის გამკაცრებისთვის. ეს კანონები საფრთხეს უქმნის სამოქალაქო აქტივისტების საქმიანობას, აუარესებს სამოქალაქო საზოგადოების და დამოუკიდებელი მედიის ცხოვრებას, რეტროგრადულად ართმევს ადამიანის უფლებების დაცვის მექანიზმებს, უსამართლოდ ზღუდავს ძირითად თავისუფლებებს და აზარალებს გადაწყვეტილების დემოკრატიულად მიღების პროცესს.

ეს ნაბიჯები კიდევ უფრო ასუსტებს დემოკრატიის საფუძვლებს საქართველოში. მსგავსი ქმედებები ფუნდამენტურად შეუთავსებელია ევროკავშირის დემოკრატიის, სამართლის უზენაესობისა და მედიაპლურალიზმის ღირებულებებთან და ძალიან შორს არის იმისგან, რასაც ველოდებით კანდიდატ ქვეყანაში. ისინი ნეგატიურად იმოქმედებს საქართველოს ევროკავშირში გაწევრიანების გზაზე. ევროკავშირის ამ ღირებულებების ერთგულება არაა სავაჭრო საკითხი.

საქართველო მოსახლეობის უმრავლესობას სურს, საქართველო შეუერთდეს ევროკავშირს. ჩვენ მოვუწოდებთ ხელისუფლებას, რომ აიღონ რეალური და უპირობო ვალდებულება ევროკავშირის გზაზე დაბრუნებისკენ. ამისათვის საჭიროა მოქალაქეების წინააღმდეგ ძალადობის შეჩერება, უსამართლოდ დაკავებული პირების გათავისუფლება, რეპრესიული კანონების შეჩერება, კონსულტაციებისთვის ვენეციის კომისიისთვის მიმართვა და სამოქალაქო საზოგადოების და ყველა პოლიტიკური აქტორისათვის მნიშვნელოვანი დიალოგის დაწყება, რათა კრიზისიდან გამოსავალი ვიპოვოთ.

საქართველოს ევროკავშირის წევრობის გზაზე დაბრუნება მთლიანად დამოკიდებულია ქვეყნის ხელისუფლებაზე.

ევროკავშირი მზადაა მხარი დაუჭიროს ქართველი ხალხის ევროპულ მისწრაფებებს და ყველა ძალისხმევას დემოკრატიული, სტაბილური და ევროპული მომავლისთვის, — ვკითხულობთ წერილში.