რუსეთის რამდენიმე ოლქში ორსულ სკოლის მოსწავლეებს ერთჯერად ფულად დახმარებას, 100 000 რუბლს გადასცემენ — ამის შესახებ The Moscow Time-ში ვკითხულობთ.

მათი ცნობით, ეს კრემლის დემოგრაფიულ კრიზისთან ბრძოლის სტრატეგიის ფარგლებში მესამე რეგიონული ინიციატივაა. ციმბირის კემეროვსკის ოლქის გარდა, ორსულ მოსწავლეებს ერთჯერად დახმარებას სთავაზობენ ორიოლისა და ბრიანსკის ოლქებშიც.

განკარგულების თანახმად, ფეხმძიმე მოსწავლეების კანონიერი მეურვეები 100 000 რუბლის (1 200$) ერთჯერად ფულად დახმარებას მიიღებენ. ფულადი დახმარება გაიცემა სკოლის იმ მოსწავლე გოგოებზეც, რომლებიც 1-ელი იანვრისთვის, სულ მცირე, 22 კვირის ორსულები იყვნენ.

განკარგულების თანახმად, ფულადი დახმარების მიღება შეეძლებათ როგორც სკოლის მოსწავლეებს, ისე პროფესიული სკოლებისა და უმაღლესი სასწავლებლების სტუდენტებსაც, რომლებიც რეგისტრირებულები არიან სამშობიარო საავადმყოფოებში.

ცნობისთვის, რუსულ მედიაში გავრცელებული ინფორმაციით, სულ მცირე, 40 რეგიონი დებს პირობას, რომ უნივერსიტეტის სტუდენტ ქალებს შვილის ყოლისთვის მიმდინარე წლიდან მინიმუმ 100 000 რუბლს გადაუხდის.