"მიზანმიმართულია, რომ [ხოშტარიას საქმის] კადრების გაცნობით დღემდე არავინ დაინტერესებულა", — ამის შესახებ ოცნების ერთ-ერთმა ლიდერმა, მამუკა მდინარაძემ ოპოზიციონერი პოლიტიკოსის, ელენე ხოშტარიას საქმეზე განაცხადა.

მისი თქმით, ელენე ხოშტარიას "ნაწამები არ ეტყობა".

"ვინც არ დარწმუნდა, რომ ხოშტარია და მისი პატრონები, თანამზრახველები იტყუებოდნენ, დღეს უკვე ყველა არაობიექტურია. ვიღაცას თუ შეიძლება ეჭვი შეჰპაროდა, რომ მართლა ვიღაცამ რაღაცა უქნა ამ ადამიანს, მაგრამ დღეს ეს უკვე ეჭვიც არავის უნდა ეპარებოდეს, იქიდან გამომდინარე, რომ მისმა ადვოკატმაც კი არ ისურვა უწყვეტი კადრების გაცნობა.

ხომ ამბობენ რომ სასტიკად ნაწამებია?! ჯერ რა ეტყობა ნაწამების, მაგრამ შეტყობაზე ხომ არ არის?! მივიდეს ნებისმიერი პირი (ამას სთავაზობს შინაგან საქმეთა სამინისტრო) და ამ "საშინელი წამების კადრებს" გაეცნოს. როგორც სამინისტროში აცხადებენ, უწყვეტ კადრად არის მისი გადაადგილება, მოქმედება [ჩაწერილი]", — განაცხადა მდინარაძემ.

შეგახსენებთ, რომ ელენე ხოშტარია 28 მარტს აქციაზე დააკავეს და როგორც იზოლატორიდან გამოგზავნილ წერილში დაწერა, ზურგს უკან ხელები ბორკილებით მჭიდროდ შეუკრეს, ყბებსა და კბილებზე მიაყენეს დაზიანება და სრულად გააშიშვლეს. ელენე ხოშტარია 29 მარტს გაათავისუფლეს.

"ყოველთვის ვერიდები ჩემი პირადი ემოციების, ან შემთხვევების საზოგადოებისთვის თავს მოხვევას. განსაკუთრებით, როდესაც უამრავი ახალგაზრდაა რეჟიმის და წამების მსხვერპლი.

ამასთანავე, ამჯერად გადავწყვიტე, გაგიზიაროთ, ჩემი დაკავების დროს ჩადენილი დანაშაული მხოლოდ და მხოლოდ იმიტომ, რომ ზუსტად ვიცი, მე თუ ასე მომექცნენ, უამრავ ადამიანს კიდევ უფრო უარესად შეიძლება მოეპყრონ. ეს არც სიახლეა და არც გასაკვირი, თუმცა, ასეთ შემთხვევებში, საჯაროდ საუბარი სოლიდარობა და ერთმანეთის დაცვა არის ბრძოლის იარაღი.

მოკლედ, დაკავების შემდეგ, პოლიციის განყოფილებაში (რამიშვილზე "შუშებიანში"), პოლიციელებმა ნინო ჩხარტიშვილმა და დავით ბოლოთაშვილმა, მას შემდეგ, რაც თანამშრომლობაზე ვუთხარი უარი, ზურგისკენ ხელები ბორკილებით მჭიდროდ შემიკრეს. შემდეგ ნინო ჩხარტიშვილმა და დავით ბოლოთაშვილმა ყბებზე და კბილებზე მომაყენეს დაზიანება. არ შეგარცხვინეთ მეგობრებო, "ოლე, ოლას" სიმღერით მაგრად ვაწვალე და ვერც ვერაფერი დამაკლეს.

კიდევ უფრო შეურაცხმყოფელი ეპიზოდი მოხდა დიღომში, დროებითი მოთავსების იზოლატორში, სადაც ასევე ჩემი ნების საწინააღმდეგოდ, პოლიციიდან გამოძახებული ბრიგადის მეშვეობით, ისევ უკან შემიკრეს ხელები. ორ პოლიციელს ვეჭირე (ნინო ჩხარტიშვილს, სალომე ლაშხიას და კიდევ ერთს) მეჭიდავებოდნენ და სრულად გამაშიშვლეს. ეს ძალადობრივი გაშიშვლების პრაქტიკა არის ადამიანის ღირსების შელახვისა და მათზე ფიზიკური ძალადობის უღირსი რუსული საძაგელი მეთოდი.

აქაც მაგრად ვაწვალე, მაგრამ წარმოვიდგინე ყველა ის დაუცველი და გამოუცდელი ადამიანი, ვინც ამათ ხელში ვარდება. ზოგს ამაზე საუბრის ეშინია, ზოგს რცხვენია. ცხადია, სენსიტიურია ამ დეტალებზე საუბარი. თუმცა, აუცილებელია ვისაუბროთ, ბოლომდე მივყვეთ, დავსაჯოთ და აღმოვფხვრათ ადამიანის მიმართ ასეთი მოპყრობა.

კიდევ ერთხელ ბოდიშს ვიხდი, რომ ამდენი პრობლემის ფონზე, ჩემს თავზე გესაუბრებით, მაგრამ ჩავთვალე, რომ საქმეს ასე სჭირდება და ჩემს პირად დისკომფორტს გადავაბიჯე. კარგად ვარ, მე რა მიჭირს, რამდენი უდანაშაულო ადამიანია გამომწყვდეული ციხეში თვეებია. მადლობა მხარდაჭერისთვის!", — წერდა ელენე ხოშტარია იზოლატორიდან.