Minecraft-ის გულშემატკივრებისთვის სასიხარულო ამბავი გვაქვს, ლეგენდარული ვიდეოთამაშის კინოადაპტაციის პრემიერა მოახლოვდა. რეჟისორ ჯარედ ჰესის ხელმძღვანელობით გადაღებულ ფილმში ცნობილი მსახიობები მათ შორის, ჯეისონ მომოა, ჯეკ ბლექი და ჯენიფერ კულიჯი მონაწილეობენ.

ფილმი ამავე სახელწოდების ვიდეო თამაშზეა დაფუძნებული და ოთხი "შეუსაბამობის" თავგადასავალს ასახავს. ისინი იდუმალი პორტალით ხვდებიან უცნაურ, კუბურ, საოცრებათა ქვეყანაში. სახლში დასაბრუნებლად, ახალ სამყაროში გარკვევა მოუწევთ. ამაში კი მათ ჯეკ ბლექის პერსონაჟი, გამოცდილ ხელოსანი სტივი, ეხმარება.

The Hollywood Reporter-თან ინტერვიუში მომოა და ბლექი შეთანხმდნენ, რომ მსოფლიოს სასწრაფოდ ესაჭიროება Minecraft-ის ფილმი, რადგან ის სითბოთი და სიყვარულითაა სავსე.

"ახლა მსოფლიოს სიყვარული სჭირდება. ირგვლივ ძალიან ბევრი ძალადობა, ომი და სიძულვილია. რაც მე ამ ფილმში მიყვარს ისაა, რომ მასში დიდი სიყვარული და ბევრი კრეატიულობაა. არის გარკვეული ბრაზი და ძალადობაც, მაგრამ საბოლოოდ იმარჯვებს მეგობრობა და ერთად მუშაობა, რათა [სამყარო] უკეთესი ადგილი გახდეს" — განაცხადა ჯეკ ბლეკმა ფილმის პრემიერაზე.

"ვფიქრობ, ახლა ყველას სჭირდება რეალობისგან ცოტათი გაქცევა. ნამდვილად სასიამოვნოა ამ მართლაც სახალისო თავგადასავლის ყურება და რაც მთავარია, სიცილი და სიცილი! ჩვენ იმედებს არ გაგიცრუებთ. თქვენთვის ბევრი ვიმუშავეთ და ვფიქრობ, რომ მაინკრაფტის სამყარო გავაცოცხლეთ. ჩემი აზრით, ფილმი ყველას მოეწონება. იმედი მაქვს, რომ თაყვანისმცემლები აღფრთოვანდებიან და ფილმის გაგრძელების მიზეზს მოგვცემენ" — უპასუხა მომოამ კითხვაზე, თუ რას ეტყოდა Minecraft-ის გულშემატკივრებს ფილმის შესახებ.

რეჟისორი ჯარედ ჰესი, რომელიც ცნობილია თავისი უნიკალური იუმორითა და ორიგინალური ხედვით, შეეცდება შეინარჩუნოს თამაშის ავთენტური სტილი და მაყურებელს თამაშის მსგავსი გამოცდილება მიაღებინოს. ფილმის პროდიუსერები ამბობენ, რომ სიუჟეტი მაყურებლებს როგორც სათავგადასავლო, ასევე ემოციურ ისტორიას შესთავაზებს, რაც პროექტს Minecraft-ის თამაშის გულშემატკივრებისთვის განსაკუთრებით მიმზიდველს გახდის. ცნობისთვის, ფილმის პრემიერა საქართველოში ხუთშაბათს, 3 აპრილს, შედგება.