ეუთოს ადამიანის უფლებათა ოფისი (ODIHR) ოცნების ხელისუფლების მიერ "უცხოელი აგენტების რეგისტრაციის შესახებ" კანონის მიღებას ეხმაურება და წერს, რომ საქართველოს კანონმდებლობა უცხოელ აგენტებთან დაკავშირებით შეშფოთებას იწვევს სამოქალაქო საზოგადოებაზე უარყოფითი გავლენის გამო.

"საქართველოს ახალი კანონი "უცხოელი აგენტების რეგისტრაციის შესახებ" კანონი, რომელიც ყველა ფიზიკურ პირს ან ორგანიზაციას უცხოეთის ინტერესებში მოქმედად თვლის და უცხოურ აგენტად რეგისტრაციას სთხოვს, რომელიც უცხოურ დაფინანსებას იღებს, წინააღმდეგ შემთხვევაში სასჯელს დაკისრებას ითვალისწინებს, ზრდის შეშფოთებას ბოლო დროს მიღებულ სხვა კანონპროექტებთან დაკავშირებით და სამოქალაქო საზოგადოებაზე კანონის უარყოფით გავლენაზე", — ნათქვამია გავრცელებულ განცხადებაში.

ODIHR-ის დირექტორმა მარია ტელალიანმა განაცხადა, რომ "ეს კანონი დიდ გავლენას ახდენს სამოქალაქო საზოგადოების მუშაობაზე და ყველაზე, ვინც მუშაობს ადამიანის უფლებების დაცვის მიმართულებით. სამოქალაქო საზოგადოება სასიცოცხლოდ მნიშვნელოვანია ყველა დემოკრატიისთვის და ნებისმიერმა ახალმა მოთხოვნამ უნდა გააძლიეროს მათი მუშაობა საერთაშორისო სტანდარტების შესაბამისად და არ უნდა დაუწესოს შეზღუდვები".

განცხადებაში ასევე ვკითხულობთ, რომ ახლად მიღებული კანონი მიზნად ისახავს შეცვალოს გასულ წელს მიღებული "კანონი უცხოური გავლენის გამჭვირვალობის შესახებ", იმ შეშფოთების ფონზე, რომ ის შეაფერხებს გაერთიანების, მშვიდობიანი შეკრების და გამოხატვის თავისუფლებას. კანონმა, სხვა ბოლოდროინდელ საკანონმდებლო ინიციატივებთან ერთად, შეიძლება კიდევ უფრო შეზღუდოს სამოქალაქო საზოგადოების ორგანიზაციებისა და უფლებადამცველების საქმიანობა.

ამასთან, ODIHR წერს, რომ ერთი ქვეყნიდან მეორეში კანონმდებლობის გადატანას ყოველთვის სიფრთხილით უნდა მივუდგეთ და განიხილოს უფრო ფართო ეროვნული ინსტიტუციური და სამართლებრივი ჩარჩოს კონტექსტში.

ODIHR მოუწოდებს საქართველოს ხელისუფლებას გადახედონ საკანონმდებლო ინიციატივის იმპლემენტაციას და კიდევ ერთხელ აღნიშნავს, რომ საჭიროა კანონის ყურადღებით ხელახლა შეფასება.

"ეუთოს ყველა მონაწილე სახელმწიფომ აიღო ვალდებულება დაიცვას შეკრების, გაერთიანებისა და გამოხატვის თავისუფლების უფლებები, როგორც კანონში, ასევე პრაქტიკაში. მათ ასევე აღიარეს სამოქალაქო საზოგადოების მნიშვნელობა ადამიანის უფლებების, დემოკრატიისა და კანონის უზენაესობის ხელშეწყობისთვის. მიუხედავად იმისა, რომ ლობისტური საქმიანობის რეგულირება მნიშვნელოვანი ინსტრუმენტია საზოგადოებრივი გადაწყვეტილებების მიღების გამჭვირვალობისა და მთლიანობის უზრუნველსაყოფად და კორუფციის თავიდან ასაცილებლად, მან პატივი უნდა სცეს ამ უფლებებს და არ შელახოს პოლიტიკური და საზოგადოების მონაწილეობა", — ნათქვამია გავრცელებულ წერილში.