თურქეთი აცხადებს, რომ იმ შემთხვევაში თუ ამერიკის შეერთებული შტატები ერდოღანის მიერ სახელმწიფო გადატრიალების მცდელობაში დადანაშაულებულ ფეტულა გიულენს თურქეთს არ გადასცემს, ეს უკანასკნელი აშშ-სთან "მეგობრობის საკითხის გადახედავს". ინფორმაციას Reuters ავრცელებს.

გამოცემის ცნობით, ბოლო მონაცემები თანახმად, 15 ივლისს თურქეთში სახელმწიფო გადატრიალების მცდელობაში ბრალდებით 20 ათასამდე მოქალაქე, მათ შორის სამართალდამცავი ორგანოების წარმომადგენლები, სამხედროები და უბრალო მოქალაქეები, დააპატიმრეს ან დაკავებული თანამდებობიდან გაუშვეს.

ადგილობრივი ფინანსთა სამინისტროს ინფორმაციით, უწყების 1500 თანამშრომელს შეუჩერეს უფლებამოსილება, 30 გუბერნატორი და ხელისუფლების მაღალი რანგის 50 წარმომადგენელი კი სამსახურიდან გაუშვეს.

პრემიერმინისტრის, ბინალი ილდიმირის ცნობით კი, ჯამში 7543 ადამიანი დააკავეს, საიდანაც 6038 სამხედრო პირია.

ამასთან, ამბოხებას 290 ადამიანის სიცოცხლე ემსხვერპლა, საიდანაც 200-მდე ადამიანი რიგითი მოქალაქე, პოლიციელი ან სამხედრო პირია. ამბოხების შედეგად, 1400-მდე ადამიანია დაშავებული.

თურქეთის პრეზიდენტმა, რომელმაც მომხდარში აშშ-ში მცხოვრები სასულიერო პირი, ფეტულა გიულენი დაადანაშაულა, ამბოხების ჩახშობის შემდეგ განაცხადა, რომ შესაძლოა ხელისუფლებამ სიკვდილით დასჯის აღდგენა განიხილოს, რასაც მსოფლიო ლიდერებისგან არაერთგვაროვანი გამოხმაურებები მოჰყვა.

15 ივლისს ანკარასა და სტამბოლში ტანკები გამოჩნდნენ, რომლებმაც თურქეთის პარლამენტის შენობასა და პრეზიდენტის სასახლესთან ცეცხლი გახსნეს. თვითმფრინავებმა დედაქალაქში მდებარე ეროვნულ სადაზვერვო შტაბს ცეცხლი გაუხსნეს.

სამხედრო ფორმაში გამოწყობილმა სამხედროებმა კი ბოსფორის ხიდი გადაკეტეს, რომელიც სტამბოლის აზიურ და ევროპულ ნაწილებს აკავშირებს ერთმანეთთან. ისინი ამბობდნენ, რომ ქვეყნის დემოკრატიის დასაცავად მოქმედებდნენ და ხელისუფლების დამხობა სურდათ.

სახელმწიფო გადატრიალების მცდელობა წარუმატებლად დასრულდა, რასაც შედეგად 300-მდე ადამიანის დაღუპვა, 1500-მდე პირის დაშავება, უამრავი ადამიანის დაპატიმრება და თანამდებობიდან გადაყენება მოჰყვა.