თბილისის საქალაქო სასამართლოში კოალიცია "ძლიერი საქართველოსთვის" ერთ-ერთ ლიდერს, მამუკა ხაზარაძეს აღკვეთის ღონისძიების სახით 50 000-ლარიანი გირაო შეეფარდა.

მამუკა ხაზარაძის განცხადებით, ადვოკატებთან მოლაპარაკებების შემდეგ გადაწყვეტს, გადაიხდის თუ არა სასამართლოს მიერ დაკისრებულ 50 000-ლარიან გირაოს. ხაზარაძემ ასევე დასძინა, რომ მისი პოლიტიკაში ჩართვის შემდეგ, ქართული ოცნების მხრიდან მისი დისკრედიტაციის მცდელობა მიმდინარეობს.

"ბოლო 5 წლის განმავლობაში, რაც პოლიტიკაში შემოვედი, ქართული ოცნების მხრიდან მიმდინარეობს ჩემი პირადი დისკრედიტაციის მცდელობა სხვადასხვა მოგონილი საქმეებიდან გამომდინარე, ესეც განვაცხადე სასამართლოში. მიუხედავად იმისა, რომ ბიზნესში ჩემი მოღვაწეობის 30 წლის განმავლობაში არცერთი საქმე არ ყოფილა ჩემს წინააღმდეგ, არც საჩივარი ან რამე გარჩევა, მზად ვარ, მიუხედავად იმისა, რომ 15 წლის წინანდელ აბსურდულ ზღაპრებს ჰყვებიან, მზად ვარ, ამ სასამართლოში გავცე კვალიფიციური პასუხი, თუ მსგავსი რამ არსებობს. ამიტომ, პირველ რიგში, მოვუწოდებ პოლიტპატიმრებს, ბიჭებო, მაგრად იყავით! აქ ჩვენ მაგრად ვართ, ნებისმიერი გადაწყვეტილება რაც არ უნდა მიიღოს, ეს იქნება იმის მტკიცებულება, რომ ჩვენ თქვენ არ მიგატოვებთ. არ მივატოვებთ თავისუფლებისთვის ბრძოლას, არ მივატოვებთ ქართველი ხალხის არჩევანს, რომ ეს ქვეყანა გახდეს ევროკავშირის ნაწილი", — განაცხადა ხაზარაძემ.

მამუკა ხაზარაძე 25 მარტს, "ნაციონალური მოძრაობის" საქმიანობის შემსწავლელ დროებით საგამოძიებო კომისიაზე არ გამოცხადდა. მას ბრალი სისხლის სამართლის კოდექსის 349-ე მუხლით წარედგინა, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს.

ცნობისთვის, ენმ-ს შემსწავლელ კომისიის თავმჯდომარე თეა წულუკიანის განცხადებით, სხდომაზე არ გამოცხადება ჯარიმით ან თავისუფლების 1 წლის აღკვეთით ისჯება.

კომისიაზე მამუკა ხაზარაძესთან ერთად კოალიცია ძლიერი საქართველოს ერთ-ერთი ლიდერი ბადრი ჯაფარიძეც იყო დაბარებული და ისიც არ გამოცხადდა. ბადრი ჯაფარიძის განცხადებით, ის არ აპირებს პროკურატურაში დაკითხვაზე გამოცხადებას და პირდაპირ მაგისტრუ მოსამართლეს წინ წარდგება.

2 მარტის გავრცელებული ინფორმაციით, ენმ-ს საქმიანობის შემსწავლელმა კომისიამ კოალიცია ცვლილებისთვის კიდევ სამი ლიდერი, ნიკა მელია, ნიკა გვარამია და ზურა ჯაფარიძეც დაიბარა.

ცნობისთვის, საქართველოს მე-5 პრეზიდენტმა, სალომე ზურაბიშვილმა ბრიფინგზე განაცხადა, რომ "ნაციონალური მოძრაობის" საქმიანობის შემსწავლელ დროებით საგამოძიებო კომისიაზე "წინააღმდეგობის პლატფორმაში" გაწევრიანებული პარტიები გამოცხადებას არ აპირებენ.