Reuters აქვეყნებს სტატიას სათაურით - "ნატოსკენ სწრაფვაში პროგრესის ნაკლებობამ შესაძლოა საქართველო რუსეთისკენ მიაბრუნოს". როგორც საინფორმაციო სააგენტო წერს, იმ შემთხვევაში, თუ უახლოეს მომავალში პოსტ-საბჭოთა საქართველო ვერ დაინახავს რაიმე ხელშესახებ შესაძლებლობას ნატოში გასაწევრიანებლად, შესაძლოა რუსეთის ორბიტას დაუბრუნდეს.

დღეს პოლონეთის დედაქალაქ ვარშავაში ნატოს ორდღიანი სამიტი დაიწყო, რომელზეც საქართველოს იმედი აქვს, რომ ალიანსისგან მიიღებს გარანტიებს, საბოლოო ჯამში, ჩვენი ქვეყნის ნატოში გაწევრიანების შესახებ.

"თუმცა, აღსანიშნავია, რომ ნატო საქართველოსთვის მაპის - გაწევრიანების სამოქმედო გეგმის მიცემისგან თავს იკავებს, რადგან რუსეთის გაღიზიანების საფრთხეს ხედავს. სულ ცოტა ხნის წინ კი ჩრდილოატლანტიკურ ალიანსში ჩერნოგორია გაწევრიანდა, რამაც საქართველოს თავი მიტოვებულად აგრძნობინა", - წერს როიტერსი.

როგორც საინფორმაციო სააგენტო აღნიშნავს, სოციოლოგიური გამოკითხვები საქართველოში აჩვენებს, რომ მოსახლეობის დიდ ნაწილს სურს ნატოში გაწევრიანება, რადგან მიიჩნევს, რომ ჩრდილოატლანტიკური ალიანსი დაიცავს საქართველოს რუსეთის აგრესიისგან. და ვინაიდან ნატოში გაწევრიანებისკენ საქართველო ძალიან ნელა დგამს ნაბიჯებს, საზოგადოების მეორე ნაწილის რაოდენობა, რომელსაც მიაჩნია, რომ ნატოს ნაცვლად საქართველომ ურთიერთობა მოსკოვთან უნდა დაათბოს, იზრდება.

"როგორ დაგვეხმარა დასავლეთი? დაგვეხმარა ნატო ომის დროს? არა. რუსეთი ჩვენი ძლიერი და გავლენიანი მეზობელია. ვშიშობ, კიდევ დაიწყება ომი თუ ჩვენი ნატოში გაწევრიანების სურვილით უფრო გავაღიზიანებთ რუსეთს," - როიტერსთან საუბარში ამბობს ავთანდილ მაისურაძე, 69 წლის პენსიონერი თბილისიდან.

როიტერსის ასევე წერს, რომ საქართველო არის ტესტი, როგორ მოექცევიან დასავლეთის სახელმწიფოები ისეთ ქვეყნებს, როგორიც უკრაინა და საქართველოა, რომელსაც სურს ნატოსა და ევროკავშირში გაწევრიანება, მაგრამ ასევე ესენი არიან ქვეყნები, რომლებსაც კრემლი თავისი გავლენის სფეროდ განიხილავს.

საქართველო სასოწარკვეთაში არ უნდა ჩავარდეს, არ უნდა განიხილოს მისი ამჟამინდელი მდგომარეობა, როგორც უიღბლობა, არამედ განიხილოს ის, როგორც შეუწყვეტელი პროცესი

ჯონ კერი

როიტერსი აქცენტს ქართული საზოგადოების მოუთმენლობაზეც აკეთებს და ამ კონტექსტში იხსენებს აშშ-ს სახელმწიფო მდივნის, ჯონ კერის, რომელმაც ქართველებს მოთმინებისკენ მოუწოდა და განმარტა, რომ საქართველო სასოწარკვეთაში არ უნდა ჩავარდეს, არ უნდა განიხილოს მისი ამჟამინდელი მდგომარეობა, როგორც უიღბლობა, არამედ განიხილოს ის, როგორც შეუწყვეტელი პროცესი.

ბრიტანული საინფორმაციო სააგენტო ნატო-საქართველოს პარტნიორობის გაძლიერების არგუმენტად ასახელებს საქართველოში ნატოს ტრენინგ ცენტრის გახსნის, ასევე ქართველი სამხედროების ნატოს სწავლებებში მონაწილეობას: "თუმცა, მოსახლეობის დიდი ნაწილისთვის ყველაზე მნიშვნელოვნად მაინც ალიანსში გაწევრიანება რჩება".

"იმედგაცრუებამ იმძლავრა, რადგან პოლიტიკური ელიტების მიერ გავრცელებული ინფორმაცია ნატოში სწრაფ გაწევრიანებასთან დაკავშირებით, არ გამართლდა", - განაცხადა როიტერსთან საუბარში საქართველოს პოლიტიკის ინსტიტუტის დირექტორმა, კორნელი კაკაჩიამ.

ეროვნულ-დემოკრატიული ინსტიტუტის მიერ ჩატარებულმა გამოკითხვამ კი აჩვენა, რომ იმ ადამიანების რიცხვი, რომლებსაც სურთ ევრაზიულ კავშირში გაწევრიანება, 2013 წლის აგვისტოდან (11%) 2016 წლის მარტისთვის (20%) საგრძნობლად გაიზარდა.

როგორც როიტერსი აღნიშნავს, პრორუსულ პოლიტიკურ ძალებს 2016 წლის არჩვენების შედეგად აქვთ შანსი, პარლამენტში ადგილები მოიპოვონ. აღსანიშნავია, რომ 2014 წლის ადგილობრივ არჩევნებში პრორუსულმა პარტიებმა, პატრიოტთა ალიანსმა და დემოკრატიულმა მოძრაობამ, პროპორციული ხმების 20% მოიპოვა.

როიტერსი ნინო ბურჯანაძეს ნატოს მოწინააღმდეგე პოლიტიკოსად მოიხსენებს და ხაზს უსვამს მის თავდაჯერებულობას, რომლის მიხედვითაც ის ამბობს, რომ ნატოში გაწევრიანების დროში გაჭიანურებამ მისი მხარდამჭერების გაზრდა გამოიწვია.