თბილისში, ამაღლების ქუჩაზე მოქალაქე პაატა სამარგულიანი მეორე მოქალაქეს გამოესარჩლა, რომლის დაკავებასაც პოლიცია ცდილობდა. ამის შემდეგ პოლიციამ მისი დაკავებაც სცადა, რა დროსაც ის შეუძლოდ გახდა. როგორც პაატა სამარგულიანი ტვ პირველთან ჰყვება, პოლიციის გაღიზიანება გამოიწვია მისმა ფრაზამ: "მოვა დრო ეს ხალხი ყოფას გიტირებთ ყველას".

"დავინახე, რომ ზემოდან მოდიოდა მსუბუქი მანქანა, უკან მოსდევდა პოლიცია, ასიგნალებდა, მერე რა მოხდა არ ვიცი, მაღაზიაში შევედი, ცუდად ვიყავი ძალიან, გამყიდველი მიცნობს, შეგიძლიათ უთხრა, წყალი მოვთხოვე, თავბრუ მეხვეოდა, დამაწყნარა, გადმოვედი ისევ გზაზე, ისევ იდგნენ ამ პატარა ბიჭს პოლიციელები ეჭიდავებოდნენ და ტენიდნენ მანქანაში. ვუთხარი, რატომ ეჩხუბებით-მეთქი, წყნარად უთხარი, კაცურად, შენ ეს დააშავეო, შენ ვინ გეკითხებაო, მე ვუთხარი, მე კი არ მეკითხება შვილო, მე ხალხი ვარ-მეთქი და მოვა დრო ეს ხალხი ყოფას გიტირებთ ყველას-თქო. ეს როგორც ვუთხარი, მითხრეს შემაგინეო, თურმე ყოფის ტირება და თუნდაც, დედის ტირება ყოფილა გინება. დამავლეს ხელი, დამადეს ხელბორკილები, დამიწყეს ჭიდაობა, მტენიდნენ მანქანაში და გავხდი ცუდად, წავიქეცი, მერე აღარ მახსოვს, მერე ხალხმა დამალევინა წამლები და მომიყვანა გონზე, ახლა მეუბნებიან, პოლიციაში უნდა წაგიყვანოთო. რატომ უნდა წავყვე? იმიტომ, რომ ასეთ ქვეყანაში ვცხოვრობთ? არ მივყვები და დგანან აქ", — ამბობს მოქალაქე.

რადიო თავისუფლებასთან საუბრისას პაატა სამარგულიანი აცხადებს, რომ პოლიციის განყოფილებაშია დაბარებული და მის წინააღმდეგ სისხლის სამართლის საქმე აღიძრა.

NEWS.On.ge დამატებითი დეტალების გარკვევას შსს-სთან ცდილობს.