13 არასამათავრობო ორგანიზაცია აფგან მუხტარლის გამოძიებასთან დაკავშირებით მთავარ პროკურორთან შეხვედრას ითხოვს. გავრცელებულ განცხადებაში ნათქვამია, რომ აფგან მუხთარლისა და მის ცოლს, ლეილა მუსტაფაიევას დაზარალებულის სტატუსი უნდა მიენიჭოს.

აზერბაიჯანელ ჟურნალისტ აფგან მუხტარლის 2018 წლის 12 იანვარს ელაქნის (აზერბაიჯანი) რაიონულმა სასამართლომ დამნაშავედ სცნო და 6-წლიანი პატიმრობა მიუსაჯა. მას აზერბაიჯანში საზღვრის უკანონო კვეთასა და 10 ათასი ევროს არადეკლარირებულად გადატანას ედავებიან. სასამართლომ არ დააკმაყოფილა დაცვის მხარის არც ერთი შუამდგომლობა. არასამათავრობოების თქმით, სასამართლომ მუხტარლის მიმართთ ადამიანის უფლებათა ევროპული კონვენციით დაცული სამართლიანი სასამართლოს უფლება დაარღვია.

თბილისიდან 29 მაისს გაუჩინარებული ჟურნალისტი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. ამასთან დაკავშირებით გამოძიება სისხლის სამართლის კოდექსის 143-ე მუხლის მიხედვით მიმდინარეობს, არც გულისხმობს თავისუფლების უკანონოდ აღკვეთას დამამძიბელ გარემოებებში. არასამათავრობოები ითხოვენ, რომ გამოძიება დაიწყოს 154-ე მუხლითაც (ჟურნალისტისთვის პროფესიულ საქმიანობაში უკანონოდ ხელის შეშლა).

"შემთხვევიდან უკვე რვა თვეა გასული საზოგადოებისთვის კვლავ უცნობია აფგან მუხტარლის საქმესთან დაკავშირებით საქართველოში მიმდინარე გამოძიების დეტალები და შედეგი. სერიოზული კითხვები ჩნდება გამოძიების ეფექტურობასთან დაკავშირებით", - ნათქვამია განცხადებაში.

განცხადების მიხედვით, არაეფექტური გამოძიება უქმნის საქართველოს დემოკრატიის იმიჯს:

"როგორც ეს ევროპარლამენტის მიერ მიღებულ რეზოლუციაშია აღნიშნული, ევროპარლამენტი გმობს აფგან მუხტარლის თბილისიდან გატაცებას და მოუწოდებს საქართველოს ხელისუფლებას, სწრაფად, გამჭვირვალედ და ეფექტურად გამოიძიოს მუხთარლის ძალადობრივი გაუჩინარება".

საქართველოში მიმდინარე გამოძიების ფარგლებში, დღემდე არ დაკმაყოფილებულა თბილისის ადამიანის უფლებათა სახლისა და მისი წევრი ორგანიზაციის, კონსტიტუციის 42-ე მუხლის მოთხოვნა აფგან მუხტარლისათვისა და ლეილა მუსტაფაევასათვის დაზარალებულის სტატუსის მინიჭების თაობაზე:

"არ მომხდარა ეფექტური გამოძიება ლეილა მუსტაფაევასა და აფგან მუხთარლის მეგობრის, დაშგინ აღალარლის სავარაუდო თვალთვალის ფაქტებზე. აღსანიშნავია, რომ ლეილა მუსტაფაევამ გამოძიებას სავარაუდო მოთვალთვალეთა ფოტოებიც წარუდგინა, თუმცა აღნიშნულთან დაკავშირებით რეაგირება არ მომხდარა".

არასამთავრობოები განცხადებაში ითხოვენ, რომ საქართველო, რომელიც ადამიანის უფლებათა ევროპული კონვენციის ხელმომწერია, ვალდებულია უზრუნველყოს უცხო ქვეყნის მოქალაქეთა ან მოქალაქეობის არმქონე პირთა, მათ შორის, აზერბაიჯანის მოქალაქეთა, უსაფრთხოება საქართველოში და არ დაუშვას მათი იძულებითი გადაცემა წარმოშობის ქვეყანაში, სადაც ისინი შესაძლოა პოლიტიკურად მოტივირებული დაკავების, წამებისა ან არაადამიანურ მოპყრობის მსხვერპლი გახდნენ.

განცხადებას ხელს აწერს 13 არასამთავრობო ორგანიზაცია:

• თბილისის ადამიანის უფლებათა სახლი (HRHT);
• ადამიანის უფლებათა ცენტრი (HRIDC);
• საფარი;
• კონსტიტუციის 42-ე მუხლი;
• მედიის ინსტიტუტი;
• საქართველოს წამების მსხვერპლთა ფსიქო-სოციალური და სამედცინო რეაბილიტაციის ცენტრი (GCRT);
• საქართველოს ახალგაზრდა იურისტთა ასოციაცია (GYLA);
• ტოლერანტობის და მრავალფეროვნების ინსტიტუტი (TDI);
• საერთაშორისო გამჭვირვალობა-საქართველო (TI);
• საქართველოს დემოკრატიული ინიციატივა (GDI);
• სამართლიანი არჩევნებისა და დემოკრატიის საერთაშორისო საზოგადოება (ISFED);
• ადამიანის უფლებების სწავლებისა და მონიტორინგის ცენტრი (EMC);
• ფონდი ღია საზოგადოება საქართველო (OSGF).