პოლიციელზე თავდასხმისთვის, ასევე ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვა-ტარებისთვის ბრალდებული, წარსულში განზრახი დანაშაულისთვის რამდენჯერმე ნასამართლევი პირი დამნაშავედ სცნეს და ცხრა წლით თავისუფლების აღკვეთა განუსაზღვრეს.

ბრალდების მხარის მტკიცებით, 2016 წლის 2 დეკემბერს, დაკავებული დაახლოებით 18 საათზე, ნაცნობებთან ერთად ტოიოტა რავ 4 მარკის ავტომობილით იმყოფებოდა თბილისში, ნუცუბიძის ფერდობის მიმდებარე ტერიტორიაზე.

პროკურატურის განცხადებით, პოლიციის დეპარტამენტის თანამშრომლებმა შეაჩერეს აღნიშნული ავტომობილი, ბრალდებულმა კი ავტომობილიდან გადმოუსვლელად ცეცხლსასროლი იარაღიდან პოლიციის თანამშრომლების მიმართულებით რამდენჯერმე გაისროლა შემდეგ კი მიმდებარე ტერიტორიაზე მდებარე ხევში გადახტა და შემთხვევის ადგილიდან მიიმალა.

სამართალდამცველებმა ის იმავე დღეს თბილისში დააკავეს. საგამოძიებო უწყების ინფორმაციით, მისი საცხოვრებელი სახლიდან დაუდგენელ ვითარებაში შეძენილი საბრძოლო მასალა - ქარხნული წესით დამზადებული 1951 წლის ნიმუშის 9 მმ კალიბრის ვაზნა ამოიღეს.