12 მარტს, აშშ-სა და უკრაინას შორის საუდის არაბეთში გამართული მოლაპარაკებები შედგა — უკრაინამ მზადაა, მოაწეროს ხელი 30-დღიან ცეცხლის შეწყვეტის შეთანხმებას, რომელიც მხარეთა შეთანხმებით შესაძლოა გაგრძელდეს. ცეცხლის შეწყვეტის შეთანხმების ამოქმედება რუსეთის ფედერაციის თანხმობაზეა დამოკიდებული.

მხარეები ასევე შეთანხმდნენ უკრაინის კრიტიკული მინერალების რესურსების განვითარების შესახებ, და ორივე ქვეყნის პრეზიდენტი მზადაა ხელი მოაწეროს შეთანხმებას აშშ-ის პარტნიორობით ქვეყნის ეკონომიკის გასაფართოებლად და უკრაინის ხანგრძლივი მშვიდობის უზრუნველსაყოფად.

აშშ-სა და უკრაინის მოლაპარაკების შედეგებს მსოფლიო ლიდერებიც ეხმაურებიან.

საფრანგეთის პრეზიდენტი ემანუელ მაკრონი:

საფრანგეთის პრეზიდენტი ემანუელ მაკრონი მიესალმება უკრაინის განცხადებას, რომ უკრაინა მზად არის 30-დღიანი ცეცხლის შეწყვეტისთვის.

"ბურთი ახლა აშკარად რუსეთის მოედანზეა," — დაწერა მაკრონმა X-ზე.

მისი თქმით, საფრანგეთი და მისი პარტნიორები რჩებიან მყარი და გრძელვადიანი მშვიდობის ერთგულნი, რომელსაც მხარს დაუჭერს უკრაინის უსაფრთხოების მტკიცე გარანტიები.

დიდი ბრიტანეთის პრემიერმინისტრი კირ სტარმერი:

დიდი ბრიტანეთის პრემიერმინისტრი კირ სტარმერი განცხადებას აქვეყნებს, სადაც მიესალმება ჯედაში მიღწეულ შეთანხმებას და ულოცავს პრეზიდენტ ტრამპსა და პრეზიდენტ ზელენსკის "ამ შესანიშნავ გარღვევას".

"ეს არის მნიშვნელოვანი მომენტი უკრაინაში მშვიდობისთვის და ჩვენ ყველამ უნდა გავაორმაგოთ ჩვენი ძალისხმევა, რათა რაც შეიძლება მალე მივაღწიოთ გრძელვადიან და უსაფრთხო მშვიდობას. როგორც ამერიკულმა და უკრაინულმა დელეგაციებმა განაცხადეს, ბურთი ახლა რუსეთის მოედანზეა. რუსეთი ახლა უნდა დათანხმდეს ცეცხლის და ბრძოლების შეწყვეტას", — აღნიშნა სტარმერმა.

მისივე თქმით, შაბათს მოიწვევს მხარდამჭერი ქვეყნების ლიდერებს ვირტუალურ შეხვედრაზე "შემდეგი ნაბიჯების განსახილველად" და დასძინა, რომ მზად არიან დაეხმაროთ ამ ომის დასრულებას სამართლიანი გზით.

პოლონეთის პრემიერმინისტრი დონალდ ტუსკი:

პოლონეთის პრემიერმინისტრმა დონალდ ტუსკმა განაცხადა, რომ ევროპა მზად არის დაეხმაროს სამართლიან და გრძელვადიან მშვიდობას.

"როგორც ჩანს, ამერიკელებმა და უკრაინელებმა მნიშვნელოვანი ნაბიჯი გადადგეს მშვიდობისკენ. ევროპა კი მზადაა, დაეხმაროს სამართლიანი და ხანგრძლივი მშვიდობის მიღწევაში," — დაწერა ტუსკმა.

საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენელი კაია კალასი:

საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა კაია კალასმა განაცხადა, რომ ევროკავშირი მიესალმება უკრაინისა და აშშ-ის ერთობლივ განცხადებას საუდის არაბეთში შეხვედრის შემდეგ რომ ევროკავშირი მზადაა, უკრაინასთან, შეერთებულ შტატებთან და სხვა პარტნიორებთან ერთად, სრული როლი ითამაშოს მომავალი ნაბიჯების მხარდასაჭერად. კალასმა ასევე დასძინა, რომ ახლა რუსეთმა უნდა აჩვენოს თავისი მზადყოფნა მშვიდობის მისაღწევად.

"ევროკავშირი მიესალმება უკრაინისა და შეერთებული შტატების ერთობლივ განცხადებას საუდის არაბეთის სამეფოში შეხვედრის შემდეგ, მათ შორის წინადადებებს ცეცხლის შეწყვეტის შესახებ შეთანხმების, ჰუმანიტარული ძალისხმევის და აშშ-ის სადაზვერვო ინფორმაციის გაზიარებისა და უსაფრთხოების დახმარების განახლებაზე.

ევროკავშირის მიზანია მხარი დაუჭიროს უკრაინას, რათა მიაღწიოს ყოვლისმომცველ, სამართლიან და გრძელვადიან მშვიდობას გაერო-ს წესდების და საერთაშორისო სამართლის პრინციპებზე დაყრდნობით. ცეცხლის შეწყვეტის წინადადება — რუსეთის მიერ მიღების შემთხვევაში -— შეიძლება მნიშვნელოვანი ნაბიჯი იყოს ამ მიმართულებით. ახლა რუსეთმა უნდა აჩვენოს თავისი მზადყოფნა მშვიდობის მისაღწევად." — ვკითხულობთ განცხადებაში.

ევროკომისიის პრეზიდენტი ურსულა ფონ დერ ლაიენი და ევროპული საბჭოს პრეზიდენტი ანტონიო კოშტა:

ევროკომისიის პრეზიდენტი ურსულა ფონ დერ ლაიენი და ევროპული საბჭოს პრეზიდენტი ანტონიო კოშტა იდენტურ განცხადებებს ავრცელებენ, რომ ისინი მიესალმებიან ცეცხლის შეწყვეტის შეთანხმებაზე წინადადებას და ამერიკული სადაზვერვო ინფორმაციისა და სამხედრო დახმარების აღდგენას. კალასის მსგავსად, მათაც ხაზი გაუსვეს, რომ ევროკავშირი მზად არის თავისი როლი შეასრულოს სამშვიდობო მოლაპარაკებებში და "ბურთი ახლა რუსეთის მოედანზეა".

"მივესალმებით დღევანდელ ამბებს ჯიდადან აშშ-უკრაინის საუბრებზე, მათ შორის ცეცხლის შეწყვეტის შეთანხმებაზე წინადადებას და ამერიკული სადაზვერვო ინფორმაციისა და სამხედრო დახმარების აღდგენას.

ეს დადებითი განვითარებაა, რომელიც შეიძლება იყოს ნაბიჯი, ყოვლისმომცველი, სამართლიანი და მყარი მშვიდობისკენ უკრაინისთვის.

ბურთი ახლა რუსეთის მოედანზეა.

ევროკავშირი მზად არის თავისი როლი შეასრულოს პარტნიორებთან ერთად სამომავლო სამშვიდობო მოლაპარაკებებში," — განაცხადეს ფონ დერ ლაიენმა და კოშტამ.

ამავე თემაზე რუსული მხარის გამოხმაურებები:

როდის გაიმართება აშშ-რუსეთის მოლაპარაკებები უკრაინის ომზე და რა პირობებს აყენებდა პუტინი თვენახევრის წინ?