აშშ-ში, ვირჯინიის შტატის ერთ პატარა ქალაქ ეშლენდში, სასმელების მაღაზიის თანამშრომელს უქმეებიდან დაბრუნებულს უსიამოვნო სიურპრიზი დახვდა: ობიექტი გატეხილი იყო, იქაურობა კი — ალეწილ-დალეწილი. უფრო ზუსტად, სანამ მაღაზია მადლიერების დღისთვის დაეკეტათ, ვიღაცას ჭერი დაეზიანებინა, თაროებიდან სასმელები ჩამოეყარა და მთელი იატაკი მოერწყო.

დამნაშავის მოძებნას დიდი დრო არ დასჭირვებია — ადგილის გულდასმით დათვალიერების შემდეგ, მას საპირფარეშოში მიაგნეს არხეინად მიძინებულს. როგორც აღმოჩნდა, ეს ყველაფერი, არც მეტი, არც ნაკლები, ენოტმა მოაწყო. ეგ კი არა, გალეშილ ცხოველს საყვარელი სასმელიც ჰქონია: შოტლანდიური ვისკი.

მაღაზიაში მაშინვე გამოიძახეს ცხოველების კონტროლის სამსახურის ოფიცერი სამანტა მარტინი, რომელმაც გამოძინებული და გამოფხიზლებული ცხოველი ხითხითით გადაიყვანა თავშესაფარში "გამოკითხვაზე".

"პირადად მე, ენოტები მიყვარს", — აღნიშნავს სამანტა, — "პატარა ონავრები არიან. როგორც ჩანს, მაღაზიაში ჭერიდან შემოძვრა, მერე კი ყველაფერი დალეწა და დალია".

არცთუ კულტურული ქცევის მიუხედავად, ენოტს არანაირი დაზიანება არ აღენიშნებოდა (ნაბახუსევის გარდა, ცხადია), ამიტომ, რამდენიმესაათიანი ძილის შემდეგ, კვლავ ველურ ბუნებაში დააბრუნეს. ცხოველების კონტროლის სამსახურის ოფიცრისთვის მხოლოდ ერთი ჩვეულებრივი დღე იყოო, ამატებს სამანტა. თუმცა, მაღაზიის მეპატრონეები ალბათ არ დაეთანხმებიან...

რაც მთავარია, სამეთვალყურეო კამერების საშუალებით, ამ სახალისო ინციდენტის ამსახველი ვიდეომასალაც შემოგვრჩა: