საქართველოს ბანკი მოსწავლეებისთვის, სტუდენტებისთვის, ახალგაზრდა პროფესიონალებისა და მასწავლებლებისთვის განათლების შესაძლებლობების შექმნას განაგრძობს. სწორედ ამ მიზნით, მხარს უჭერს და ახორციელებს 30 საგანმანათლებლო პროექტს.

რა შესაძლებლობებს ქმნის საქართველოს ბანკი მოსწავლეებისთვის?

იდეათეკა — 11 რეგიონი, 25 სკოლა, 18 000-ზე მეტი მოსწავლისთვის შექმნილი განათლების შესაძლებლობა

მეექვსე წელია, რაც ხარისხიან განათლებაზე ხელმისაწვდომობის გასაზრდელად საქართველოს ბანკი რეგიონების სკოლებში ინოვაციურ ბიბლიოთეკებს — იდეათეკებს ხსნის, რომელთა საშუალებით, 18 000-ზე მეტი მოსწავლისთვის ქმნის შემეცნებისა და ახალი აღმოჩენების სივრცეს. ყოველი იდეათეკა აღჭურვილია მრავალფეროვანი, 2000-მდე წიგნისგან შემდგარი ბიბლიოთეკით, განათლების მისაღებად საჭირო თანამედროვე ინსტრუმენტებით — კომპიუტერებით, პროექტორებით და STEM კუთხით.

დღეისთვის იდეათეკები 11 რეგიონის, 25 სკოლაში ფუნქციონირებს და მათი რაოდენობა ყოველწლიურად იზრდება.

STEM სკოლა — 2000-მდე მოსწავლე, 300-ზე მეტი სტიპენდიატი

STEM სკოლა საქართველოს ბანკისა და კომაროვის სკოლის მიერ შექმნილი პროექტია, რომელიც VII-XI კლასის მოსწავლეებს შესაძლებლობას აძლევს, მიიღონ, როგორც თეორიული, ისე პრაქტიკული ცოდნა და გამოცდილება. STEM სკოლაში გაკვეთილები ონლაინ ტარდება, რაც საქართველოს მასშტაბით მცხოვრებ მოსწავლეებს უქმნის საშუალებას, დისტანციურად დაესწრონ გაკვეთილებს და მიიღონ ხარისხიანი განათლება.

განათლების მიღების კიდევ უფრო მეტი შესაძლებლობის შესაქმნელად, საქართველოს ბანკი ყოველწლიურად საუკეთესო შედეგის 90 სტიპენდიატს ასახელებს და მათ სწავლის ხარჯებს უფინანსებს — 60 მოსწავლეს სრულად, ხოლო 30-ს ნაწილობრივ.

წელს STEM სკოლაში სწავლის სურვილი 1500-ზე მეტმა მოსწავლემ გამოთქვა, კურსი კი საუკეთესო შედეგის 700-ზე მეტმა მოსწავლემ გაიარა.

STEM ოლიმპიადა — 300-ზე მეტი სკოლა, 1500-ზე მეტი მოსწავლე

მოსწავლეების მომავლის პროფესიებით დაინტერესების მიზნით, საქართველოს ბანკი, კომაროვის სკოლასთან ერთად, STEM ოლიმპიადას მართავს. ინიციატივის ფარგლებში კი შესაძლებლობას აძლევს მოსწავლეებს, გამოავლინონ საკუთარი ცოდნა და აღმოაჩინონ ახალი უნარები.

STEM ოლიმპიადაში წელს მონაწილეობა 150-ზე მეტი სკოლის 800-ზე მეტმა მოსწავლემ მიიღო. საპრიზო ადგილზე გასულ სკოლის გუნდს კი საქართველოს ბანკისგან ფულადი პრიზი 10 000 ლარი გადაეცა.

CODE-IT — 400-მდე მოსწავლე

მომავლის პროფესიების კიდევ უფრო მეტად პოპულარიზაციის მიზნით, საქართველოს ბანკი მხარს უჭერს მრავალ სხვადასხვა პროექტს. მათ შორის ერთ-ერთი Code-IT-ია, რომელიც საქართველოს ბანკის, Lineate-ისა და საქართველოს ინოვაციებისა და ტექნოლოგიების სააგენტოს (GITA) თანამშრომლობით შეიქმნა.

პროექტი პროგრამირებით დაინტერესებულ ახალგაზრდებს შესაძლებლობას აძლევს, საქართველოს 8 ტექნოპარკში — ოზურგეთში, ბათუმში, ზუგდიდში, სენაკში, კასპში, გურჯაანში, თელავში, ახმეტასა და თბილისში (და დამატებით 5 ლოკაციაზე) დაეუფლონ პროგრამირების საფუძვლებს. ინიციატივის ფარგლებში, წელს 170 მოსწავლე გადამზადდა.

ევერესტის ოლიმპიადა — 105 000-ზე მეტი მოსწავლე

ამასთან, საქართველოს ბანკი საქართველოში ყველაზე მასშტაბური ევერესტის მათემატიკის ოლიმპიადის გენერალური სპონსორია.

ყოველწლიურად პროექტში მონაწილეობს 35 000-ზე მეტი II, III, IV, V და VI კლასის მოსწავლე.

საქართველოს ბანკი ეკონომიკური განათლებისთვის

საქართველოს ბანკი ფინანსური განათლების ამაღლების მიზნით არაერთ პროექტს ახორციელებს, მათ შორის, მართავს ტრენინგებს მშობლებისთვის, სტუდენტებისთვისა და მასწავლებლებისთვის.

ეკონომიკის ოლიმპიადა — 1000-ზე მეტი მონაწილე

ეკონომიკური ცნობიერების ამაღლების მიზნით, საქართველოს ბანკი, ორგანიზაცია GELi-ს ინიციატივით გამართული ეკონომიკის ოლიმპიადის მხარდამჭერია. ინიციატივა საერთაშორისო პროექტის ნაწილია, რომელიც 2016 წელს (INEV) Institute of Economic Education-მა ჩეხეთში შექმნა და მასში ყოველწლიურად 30 ქვეყნის 80 000 მოსწავლე მონაწილეობს.

ოლიმპიადა სამ ეტაპად ტარდება მე-10, მე-11 და მე-12 კლასის მოსწავლეებისთვის. ეკონომიკის ოლიმპიადისადმი დაინტერესება ყოველწლიურად იზრდება. თუმცა, საქართველოში გამართულ ეროვნულ ტურში მონაწილეობის მიღება ყოველწლიურად საუკეთესო შედეგის მქონე 200 მოსწავლეს შეუძლია.

ეს საქართველოს ბანკის მიერ განხორციელებული საგანმანათლებლო პროექტების მხოლოდ ნაწილია. ამ და სხვა ინიციატივების შესახებ დეტალური ინფორმაცია ხელმისაწვდომია ვებგვერდზე.