რა ხდება: რუსმა კანონმდებლებმა 2024 წლის საპრეზიდენტო არჩევნების თარიღი განსაზღვრეს — ის 17 მარტს გაიმართება.

დეტალები: ფედერაციის ბიუროს წევრებმა თარიღი ფარული კენჭისყრით დაადგინეს. ეს ორგანო რუსეთის პარლამენტის ზედა პალატაა.

”არსებითად, ეს გადაწყვეტილება ნიშნავს საარჩევნო კამპანიის დაწყებას”,— თქვა ვალენტინა მატვიენკომ, ფედერაციის საბჭოს სპიკერმა.

რუსეთის ცენტრალური საარჩევნო კომისია, საპრეზიდენტო კამპანიასთან დაკავშირებით, ხვალ სხდომას გამართავს.

გახდება თუ არა ვლადიმირ პუტინი პრეზიდენტი მეხუთე ვადით: მას ჯერ ოფიციალურად არ განუცხადებია, რომ არჩევნებში კვლავ მიიღებს მონაწილეობას, თუმცა ელოდებიან, რომ გადაწყვეტილების შესახებ უახლოეს დღეებში გახდება ცნობილი.

  • მის მიერ მიღებული საკონსტიტუციო ცვლილებების თანახმად, პუტინს უფლება აქვს, პრეზიდენტის თანამდებობა კიდევ ორი ექვსწლიანი ვადით დაიკავოს, რაც, პოტენციურად, საშუალებას მისცემს, ხელისუფლებაში 2036 წლამდე დარჩეს.
  • იმის გამო, რომ პუტინს რუსეთის პოლიტიკურ სისტემაზე მკაცრი კონტროლი აქვს დამყარებული, არჩევნებში გამარჯვება, პრაქტიკულად, გარანტირებული აქვს. ყველას, ვისაც კი შეეძლო მისთვის არჩევებში კონკურენცია გაეწია, ან ციხეშია, ან — საზღვარგარეთ ცხოვრობს. დამოუკიდებელი მედიის საქმიანობა კი, ქვეყანაში აკრძალულია.
  • დამოუკიდებელი გამოკითხვების შედეგებმა აჩვენა, რომ, როგორც ჩანს, პუტინის მაღალ რეიტინგზე გავლენა არც ძვირადღირებულმა და ხანგრძლივმა ომმა მოახდინა უკრაინაში და არც ევგენი პრიგოჟინის წარუმატებელმა ამბოხმა გასულ ზაფხულს.

ვინ დაუპირისპირდება პუტინს არჩევნებში: კენჭისყრაში მონაწილეობის სურვილი, ჯერჯერობით, ორმა ადამიანმა დააფიქსირა — ყოფილმა დეპუტატმა ბორის ნადეჟდინმა, რომელიც მოსკოვის რეგიონის მუნიციპალური საკრებლოს წევრია და — ეკატერინა დუნცოვამ, რომელიც არის ჟურნალისტი და იურისტი ტვერის რეგიონიდან, ის ადგილობრივი საკანონმდებლო ორგანოს წევრი იყო.

  • კენჭისყრამდე მისვლა, მათთვის, შესაძლოა, რთული აღმოჩნდეს. თუ ხუთი პოლიტიკური პარტიიდან ერთ-ერთი, რომელსაც აქვს ადგილები სახელმწიფო დუმაში, არ დაასახელებს მათ კანდიდატებად, არჩევნებში მონაწილეობის მსურველებს მოუწევთ ათობით ათასი ხელმოწერის შეგროვება სხვადასხვა რეგიონში.
  • ცენტრალური საარჩევნო კომისია, ტრადიციული ქაღალდის ბიულეტენების გარდა, გეგმავს ელექტრონულ არჩევნებსაც, რუსეთის, დაახლოებით, 30 რეგიონში და განიხილავს ხმის მიცემის გახანგრძლივებას სამი დღის განმავლობაში. ეს პრაქტიკა მიღებული იყო პანდემიის დროს და მკაცრად გააკრიტიკეს არჩევნების დამოუკიდებელმა დამკვირვებლებმა.