23 ოქტომბერს რუსეთის თავდაცვის მინისტრი, სერგეი შოიგუ გაერთაინებული სამეფოს, აშშ-ს, თურქეთისა და საფრანგეთის თავდაცვის უწყებების ხელმძღვანელებს დაუკავშირდა და იმის მტკიცება დაიწყო, თითქოს უკრაინა "ბინძური ბომბის" გამოყენებას გეგმავს.

"ბინძური ბომბი" რადიოაქტიური იარაღის უმარტივესი ვერსიაა, რომელიც არ არის ბირთვული იარაღი.

• ასეთი ბომბის გაშვებისას მთავარი ზიანის მომტანი არა აფეთქება, არამედ რადიოაქტიური მასალის გაფრქვევაა.
• აშშ-ის ბირთვული მარეგულირებელი კომისიის თანახმად, ბინძური ბომბების უმეტესობა "არ გამოყოფს საკმარის რადიაციას ადამიანების მოსაკლავად ან მძიმე ავადმყოფობის გამოწვევისთვის," თუმცა შესაძლოა გამოიწვიოს პანიკა და ეკონომიკური ზიანი.

დეტალები: შოიგუს ვერსიით, უკრაინა აპირებს დაბალი წარმადობის ბირთვული იარაღის გაშვებას და რუსეთის დადანაშაულებას მასობრივი განადგურების იარაღის გამოყენებაში.

• კრემლის სახელმწიფო მედიამ რუსი მაღალჩინოსნის მორიგი პროვოკაციული განცხადება, ტრადიციულად, დიდი მონდომებით გააშუქა.
• ბრალდების პასუხად, უკრაინის თავდაცვის მინისტრი, ალექსეი რეზნიკოვი ესაუბრა თურქ, ფრანგ და ბრიტანელ კოლეგებს და განაცხადა, რომ უკრაინა მზადაა ამ თემაზე ნებისმიერი სადამკვირვებლო მისიისთვის.
• შეერთებული შტატების, გაერთიანებული სამეფოს, თურქეთის და საფრანგეთის ოფიციალურმა პირებმა კი კატეგორიულად უარყვეს შოიგუს "შეშფოთების" რეალურობა.

რატომ არის მნიშვნელოვანი: ომის კვლევის ინსტიტუტმა მიმოიხილა შოიგუს ზარი დასავლელ კოლეგებთან და გავრცელებული ინფორმაცია შეაფასა როგორც ხანგრძლივი რუსული დეზინფორმაციული კამპანიის ნაწილი, რადგან:

• რუსეთი განიცდის მუდმივ სამხედრო წარუმატებლობას და მოსალოდნელია დასავლეთ ხერსონზე კონტროლი სრულად დაკარგოს წლის ბოლომდე.
• რუსეთი ცდილობს შეანელოს დასავლეთის სამხედრო დახმარება უკრაინაში და გააღრმაოს ბზარების NATO-ს სამხედრო ალიანსში.
• რუსეთი ცდილობს ზეწოლა მოახდინოს უკრაინაზე დათმობების მიღების მიზნით.
• არ არსებობს არანაირი მტკიცებულება, რომ უკრაინას, რომელმაც 1990-იან წლებში დათმო ბირთვული იარაღი, აქვს რაიმე რადიოაქტიური ნივთიერება თავის სამხედრო არსენალში.

კონტექსტი: რუსეთის თავდაცვის სამინისტრო ჯერ კიდევ მიმდინარე წლის აპრილში ავრცელებდა ინფორმაციას, რომ აშშ "ამზადებდა პროვოკაციებს რუსეთის შეიარაღებული ძალების დასადანაშაულებლად ქიმიური, ბიოლოგიური ან ტაქტიკური ბირთვული იარაღის გამოყენებაში."

• რუსული სახელმწიფო დეზინფორმაციული მედია საშუალებები ომის დაწყების შემდეგ პერიოდულად ავრცელებენ ინფორმაციას იმაზეც, რომ დასავლეთის სახელმწიფოები მხარს უჭერენ უკრაინას ბირთვული იარაღის განვითარებაში და გეგმავენ ყალბი დროშის შეტევებს.