საქართველოს მე-5 პრეზიდენტი, სალომე ზურაბიშვილი წერს, რომ 9 აპრილი რუსეთის ჯარის მიერ ჩადენილი სასტიკი და უმოწყალო დარბევისა და საქართველოს მშვიდობიანი ბრძოლის გამარჯვების დღეა. ის ოცნების ხელისუფლებას მიმართავს, რომ "სირცხვილია" მათ მიერ დღეს გავრცელებული განცხადება, სადაც ისინი უცხო ძალას რამდენჯერმე ახსენებენ და რუსეთს არც ერთხელ

"9 აპრილი რუსეთის ჯარის მიერ ჩადენილი სასტიკი და უმოწყალო დარბევის დღეა!

9 აპრილი საქართველოს მშვიდობიანი ბრძოლის გამარჯვების დღეა!

მხოლოდ რუსებს და მათ მონებს მოაქვთ ომი და ძალადობა!

არა რუსულ ომს! არა რუსულ ძალადობას!

იმარჯვებს მშვიდობა, მომავლის რწმენა, თავისუფლება, დამოუკიდებლობა!

დიდება გმირებს!

პ.ს. სირცხვილი თქვენ — საქართველოს ე.წ. მთავრობა. "რუსები" იყვნენ ის უმოწყალო ჯარისკაცები და არა "უცხო ძალა" და ამის თქმასაც ვერ ბედავთ!", — წერს სოციალურ ქსელში საქართველოს მე-5 პრეზიდენტი, სალომე ზურაბიშვილი.

შეგახსენებთ, რომ ოცნების ხელისუფლების პრემიერმინისტრმა, ირაკლი კობახიძემ დღეს გაავრცელა განცხადება 9 აპრილთან დაკავშირებით, სადაც "უცხო ძალას" 6-ჯერ ახსენებს, რუსეთს არც ერთხელ. მისი თქმით, "9 აპრილს უცხოურმა ძალამ განახორციელა ძალადობა ჩვენი თანამოქალაქეების წინააღმდეგ".

"9 აპრილი არის დღე, როდესაც უცხოურმა ძალამ განახორციელა ძალადობა ჩვენი თანამოქალაქეების წინააღმდეგ. ამავდროულად, 9 აპრილი არის დღე, რომელმაც გააერთიანა საქართველო, დღე როდესაც ქართველებს შორის სიყვარულმა სძლია სიძულვილს. 9 აპრილი, ასევე, არის დღე, როდესაც მონობაზე თავისუფლების იდეამ გაიმარჯვა. სწორედ ამიტომ, დღეს, როგორც არასდროს, უნდა გავემიჯნოთ ყოველგვარ ძალადობას, დავამარცხოთ სიძულვილი და დავიცვათ თავისუფლების იდეა.

დღეს, 9 აპრილის ტრაგედიიდან 36 წლის თავზე, კვლავაც უცხოური ძალა ძალადობს რუსთაველის გამზირზე. დღესაც, რუსთაველის გამზირზე უცხოური ძალა აღვივებს სიძულვილს, ცდილობს ხელოვნურად დაარღვიოს ერთიანობა ქართველებს შორის და ებრძვის თავისუფლების იდეას. თუმცა, 9 აპრილის გამოცდილებამ გვასწავლა, რომ უცხოური ძალის "არსება მოკლეა" და სიძულვილსა და მონობაზე აუცილებლად სიყვარული და თავისუფლება გაიმარჯვებს.

დღეს, რუსთაველის გამზირზე უცხოურმა ძალამ სცადა ძალადობის პროვოცირება და როდესაც ამას ვერ მიაღწია, თავადვე იძალადა. ჩვენ ვერ მივცემთ სიძულვილს დამატებით ენერგიას და ჩვენს ქვეყანას ავარიდებთ უცხოური ძალის მიერ დაგეგმილ, თუნდაც მცირე, პროვოკაციას.
ვფიქრობთ, სწორედ ამას ელიან ჩვენგან 9 აპრილის გმირთა სულები, რომლებმაც სიყვარულისა და თავისუფლების იდეისთვის გაწირეს სიცოცხლე. მათ ხსოვნას ჩვენ დღეს სათანადო პატივს მივაგებთ. საქართველოში სიძულვილსა და მონობაზე სიყვარული და თავისუფლება გაიმარჯვებს!, — წერს კობახიძე.