საქართველოს საპატრიარქომ ფეისბუქ-გვერდზე განცხადებას ავრცელებს სადაც ნათქვამია, რომ, რომ "ეკლესია არ არის და არც შეიძლება იყოს რომელიმე პოლიტიკური ძალისადმი მიკერძოებული".

საპატრიარქოს შეფასებით, პაატა ბურჭულაძეს თხოვნა 9 აპრილს ქაშვეთის ეკლესიაში ზარები დაერეკათ — პირადი პოლიტიკური ინტერესებით მოტივირებულია. განცხადებაში ასევე ვკითხულობთ, რომ საპატრიარქო ტრადიციულად პანაშვიდებსა და პარაკლისებს გადაიხდის, როგორც 9 აპრილის მემორიალთან, ასევე ქაშვეთის წმინდა გიორგის სახ. ტაძარში და საქართველოს სხვა ეკლესია-მონასტრებში.

"ა.წ. 6 აპრილს, ბ-მა პაატა ბურჭულაძემ კათოლიკოს-პატრიარქისგან ითხოვა კურთხევა, 9 აპრილს სამშობლოსთვის შეწირულთა სულების საოხად და მომხდარი ტრაგედიის გახსენების მიზნით, გამთენიისას ქაშვეთის ეკლესიის ზარები დარეკილიყო; მაგრამ ბ-ნ პაატას ბოლო განცხადებითვე, იგი 8-9 აპრილს აანონსებს თავისი პოლიტიკური ბრძოლის წამოწყებას და აკეთებს მოწოდებებს ამასთან დაკავშირებით. როგორც ჩანს, ზარების დარეკვაც მისთვის, სავარაუდოდ, ამ კონტექსტში მოიაზრება;

მიუხედავად ცალკეული სასულიერო პირებისგან დაფიქსირებული ამა თუ იმ პოზიციისა, ზოგადად, ეკლესია არ არის და არც შეიძლება იყოს რომელიმე პოლიტიკური ძალისადმი მიკერძოებული. მას აქვს მრევლის და, შესაძლებლობის ფარგლებში, ქვეყნის გაერთიანებისთვის ზრუნვის მოვალეობა და საღვთო სწავლების მიხედვით მოქმედების უფლება; ეს ყველამ უნდა გაითვალისწინოს.

1989 წლიდან მოყოლებული, 9 აპრილი გამორჩეულ დღედ იქცა ჩვენი ქვეყნის ცხოვრებაში; ამასთან დაკავშირებით, წელსაც, მისი უწმინდესობისა და უნეტარესობის კურთხევით, ტრადიციისამებრ, გადახდილი იქნება პანაშვიდებიც და პარაკლისებიც როგორც 9 აპრილის მემორიალთან, ასევე ქაშვეთის წმინდა გიორგის სახ. ტაძარში და საქართველოს სხვა ეკლესია-მონასტრებში." — განაცხადა საპატრიარქომ.

ცნობისთვის, 8 აპრილს ოცნების ერთ-ერთი ლიდერი, კახი კალაძეც გამოეხმაურა პაატა ბურჭულაძის ინიციატივას იმის შესახებ, რომ საქართველოს მოქალაქეები 8 აპრილს პარლამენტის წინ შეიკრიბონ და ღამე გაათენონ.

კალაძემ განაცხადა, რომ პაატა ბურჭულაძემ ჯობია "სიმღერა გააგრძელოს"

"არ ვიცი პაატა ბურჭულაძე რას აპირებს — სიმღერა ვიცი, რომ კარგად გამოსდის და მე მგონია, რომ ჯობია სიმღერა გააგრძელოს", — განაცხადა კახა კალაძემ.

შეგახსენებთ, 8 აპრილის ღამეს სინდისის პატიმრების ოჯახის წევრებმა განაცხადეს, რომ 8 აპრილს, 9 აპრილის მემორიალთან შეიკრიბებიან და დაღუპულთა სულების პატივსაცემად ღამეს გაათევენ.


ასევე იხილეთ: