ტელეკომპანია იმედის მფლობელი ირაკლი რუხაძე bm.ge-სთან აცხადებს, რომ "ლიბერთი ბანკის" გაყიდვა სურს, თუმცა ეს არ უკავშირდება მისი სანქცირების რისკებს, რადგან "მისი ყველა კომპანია აბსოლუტურად დაცულია სანქციებისგან".

ამასთან, რუხაძე ამბობს, რომ ლიბერთის შეძენაზე ბაზის ბანკს და კიდევ "ორ ჯგუფს ესაუბრება" — ერთი არაბულია, მეორე ევროპული.

"მოლაპარაკებებს ვადასტურებ, მაგრამ არსად ახლოს არ ვართ გარიგებასთან. "ბაზისბანკთან" მოლაპარაკებებს რაც შეეხება, ორი წლის წინაც ვესაუბრებოდით. გიდასტურებთ. ველაპარაკები "ბაზისბანკს" და კიდევ ორ სხვა კომპანიას. სამი წლის განმავლობაში "ბაზისბანკს" უკვე მეორედ ველაპარაკებით; ამიტომ არაფერთან ახლოს არ ვართ, გარდა იმისა, რომ მთელმა თბილისმა დაიწყო ამაზე საუბარი. თუ რამესთან ახლოს მივედით, განცხადებას გავაკეთებთ. როგორც იცით, ჩვენ (კომპანია "ჰანიველ პარტნერსი") ვართ კერძო ინვესტიციების კომპანია და 5 წლის შემდეგ ინვესტიციის გაკეთებიდან ჩვენი აქტივები ბაზარზე გამოგვაქვს. ამიტომ "ბაზის ბანკსაც" ველაპარაკები და სხვასაც; არ მინდა ახლა დასახელება, მაგრამ კიდევ ორი ჯგუფია, რომელიც "ლიბერთის" შეძენაზე გვესაუბრება", — ამბობს ირაკლი რუხაძე.

— ქართული ჯგუფია თუ ჩინური?

არც ქართულია და არც ჩინური...

— ევროპული?

დიახ, დაახლოებით... ერთი არაბული ჯგუფია და მეორე ევროპული", — ამბობს ბიზნესმენი.

ჟურნალისტის კითხვაზე, ხომ არ უკავშირდება ეს ნაბიჯი მისი სანქცირების რისკებს, რუხაძე პასუხობს, რომ "მისი ყველა კომპანია აბსოლუტურად დაცულია სანქციებისგან".

"ჩემი ყველა კომპანია აბსოლუტურად დაცულია სანქციებისგან. მე რომ დამასანქცირონ, მაინც დაცულია ჩემი ყველა კომპანია, მაგრამ სანქციები არ მემუქრება და არც მადარდებს, თორემ აქამდე გავყიდიდი ჩემს აქტივებს", — ამბობს ირაკლი რუხაძე bm.ge-სთან.

შეგახსენებთ, დიდი ბრიტანეთის პარლამენტში "ტვ იმედის" წინააღმდეგ გამოძიების დაწყება განიხილება. ლეიბორისტული პარტიის დეპუტატმა და საგარეო ურთიერთობათა კომიტეტის წევრმა, ბლერ მაკდუგალმა დააყენა საკითხი, რომ ბრიტანეთის ეროვნულმა კრიმინალურმა სააგენტომ (NCA) დაიწყოს კომპანია Hunnewell Partners-ის იმ ოპერაციებთან დაკავშირებით გამოძიება, რაც საქართველოში პრორუსულ პროპაგანდასა და მშვიდობიანი მომიტინგეების წინააღმდეგ ძალადობის წაქეზებასთანაა დაკავშირებული.

ბლერ მაკდუგალის თქმით, საქართველოში "მშვიდობიანი მომიტინგეების ძალადობრივი დარბევა ხდება", ტელეკომპანია იმედი კი, "ამ სასტიკი მთავრობის მთავარი პროპაგანდის იარაღია და მუშაობს და იმართება დიდ ბრიტანეთში დაფუძნებული კომპანია Hunnewell Partners-ის მეშვეობით".

ამას გარდა, რადიო თავისუფლებამ 2025 წლის 9 იანვარს გამოაქვეყნა სტატია, სადაც ნათქვამია, რომ აშშ-ის კონგრესის წევრებმა აშშ-ის ახალ ადმინისტრაციას, კერძოდ — აშშ-ის მომდევნო სახელმწიფო მდივანს, მარკო რუბიოს გაუგზავნეს წერილი, სადაც მოცემულია 25 პირისგან შემდგარი სია, რომელთა დასანქცირებასაც კონგრესმენები მოითხოვდნენ და ამ ადამიანებს შორისაა იმედის მფლობელი (აშშ-ის მოქალაქე) ირაკლი რუხაძე.