"თავდაცვის მინისტრიც რომ ვერ ბედავს სიტყვა "რუსი" გამოიყენოს 9 აპრილთან მიმართებაში, ოცნების ჯერ კიდევ მხარდამჭერებო, როგორ ეგუებით ქვეყნის მომავლის, აწმყოსი და აწ უკვე წარსულის გაყიდვას და გამყიდველებს?", — ამის შესახებ საქართველოს მე-5 პრეზიდენტი სალომე ზურაბიშვილი სოციალურ ქსელში წერს და ოცნების თავდაცვის მინისტრის, ირაკლი ჩიქოვანის 9 აპრილთან დაკავშირებულ განცხადებას აზიარებს, სადაც ის 9 აპრილის ტრაგედიასთან მიმართებაში, ირაკლი კობახიძის მსგავსად, არც ის ახსენებს რუსეთს.

"თავდაცვის მინისტრიც რომ ვერ ბედავს სიტყვა "რუსი" გამოიყენოს 9 აპრილთან მიმართებაში, როგორ გვიცავს ნეტავ და ვის წინააღმდეგ! და ოცნების ჯერ კიდევ მხარდამჭერებო, რომლებიც პატრიოტიზმზე და ეროვნულობაზე თავს დებთ, რას ფიქრობთ, როგორ ეგუებით ქვეყნის მომავლის, აწმყოსი და აწ უკვე წარსულის გაყიდვას და გამყიდველებს? სიმკრთალით თუ კონფორმიზმით მნიშვნელობაა აღარ აქვს!", — წერს ზურაბიშვილი.

ირაკლი ჩიქოვანი ტექსტში, რომელიც დღეს სოციალურ ქსელში გაავრცელა წერს, რომ "1989 წლის 9 აპრილი საქართველოს უახლოეს ისტორიაში ერთ-ერთი უმნიშვნელოვანესი თარიღია, რომელიც ჩვენი ერის თავგანწირვისა და სიმტკიცის მკაფიო მაგალითია", თუმცა, არ ახსენებს რუსეთს.

"ქედს ვიხრი 9 აპრილს მშვიდობიანი საპროტესტო აქციის დროს დაღუპული ჩვენი გმირების ხსოვნის წინაშე. 1989 წლის 9 აპრილი საქართველოს უახლოეს ისტორიაში ერთ-ერთი უმნიშვნელოვანესი თარიღია, რომელიც ჩვენი ერის თავგანწირვისა და სიმტკიცის მკაფიო მაგალითია. დღე, როდესაც გაცხადდა ქართველთა ერთიანობა და სამოქალაქო თანხმობა ქვეყნის თავისუფლებისთვის. სწორედ ასეთ სიმბოლურ დღეს, ზუსტად ორი წლის შემდეგ, 1991 წლის 9 აპრილს შედგა საქართველოს სახელმწიფოებრივი დამოუკიდებლობის აღდგენის აქტი.

მიღებული აქტი გამოხატავდა რეფერენდუმზე დაფიქსირებულ ჩვენი ერის ერთსულოვან გადაწყვეტილებას და ამასთან იყო ჩვენი წინაპრების, დაღუპული გმირების ბრძოლისა და თავდადების შედეგი", — წერს ირაკლი ჩიქოვანი.