FSB-ის ყოფილმა აგენტებმა CNN-თან ინტერვიუში აღიარეს, რომ საქართველოში ჯაშუშობისთვის გამოგზავნეს.

რატომ არის მნიშვნელოვანი: მიხაილ სოკოლოვი და ვსევოლდ ოსიპოვი ჰყვებიან, თუ როგორ გადაიბირა რუსეთის უსაფრთხოების ფედერალურმა სამსახურმა (FSB) და სპეციალური მისიით საქართველოში გამოგზავნა.

რას ამბობს სოკოლოვი: 2016 წელს სტუდენტი იყო, 19 წლის ასაკში პოლიტიკურ აქტივიზმში ჩაერთო და კორუფციის საკითხებით დაინტერესდა.

  • ამბობს, რომ სამხედრო კომისარიატში დაიბარეს, სადაც FSB-ს ოფიცერი დახვდა, უთხრა, რომ გარკვეული პერიოდი აკვირდებოდნენ და ორი არჩევანი შესთავაზა — დასთანხმებოდა თანამშრომლობაზე, ან "ორი წლით წასულიყო ციხეში".
  • სოკოლოვის თქმით, იქ არსებული ძალადობრივი რეჟიმის გამო ციხეში წასვლა შეეშინდა და აგენტობას დასთანხმდა.
  • როგორც ის ჰყვება, 2017 წელს რუსი ოპოზიციონერის, ალექსეი ნავალნის ანტიკორუფციულ ორგანიზაციაში მოხალისედ დაიწყო მუშაობა, რადგან FSB-ს სჯერა, რომ ის ამერიკული დაზვერვის ცენტრალური სააგენტოსგან ფინანსდება (CIA) — თუმცა, თავად, ამის ვერანაირი მტკიცებულება ვერ იპოვა.

როგორ მოხვდა საქართველოში: მისი თქმით, FSB-მ საქართველოში მოავლინა, რათა იმ მზარდ რუსულ დიასპორაში მოეპოვებინა ნდობა, რომლებმაც რუსეთი რეპრესიების შიშის გამო დატოვეს.

  • "ეგონათ, რომ ქართული სპეცსამსახურები CIA-ს დავალებით რუს ოპოზიციონერ წევრებს იბირებენ", — განაცხადა მან, თუმცა აღნიშნა, რომ ამის მტკიცებულებებიც ვერ ნახა.
  • ამბობს, რომ უკრაინაში შეჭრის შემდეგ შიში დაამარცხა და FSB-ს ზურგი აქცია — ახლა ამსტერდამში ცხოვრობს და ნიდერლანდებში პოლიტიკური თავშესაფარს ეძებს.

რას ამბობს ოსიპოვი: FSB-მ ის 2021 წელს ნავალნის დაპატიმრების გასაპროტესტებლად გამართულ აქციაში მონაწილეობისთვის დააკავა, აგენტობა შესთავაზა, წინააღმდეგ შემთხვევაში კი დაპატიმრებით დაემუქრა.

  • როგორც ის ამბობს, საქართველოში გამოგზავნეს, სადაც ევალებოდა თვალი ედევნებინა რუსული დიასპორისთვის — გაეგოთ რას ფიქრობდნენ უკრაინის ომზე, როგორ ეხმარებოდნენ არასამთავრობო ორგანიზაციები და ქვეყნები უკრაინელ ლტოლვილებს.
  • "როგორც კი ომი დაიწყო, დამავალეს გამეგო, რას ფიქრობს საზოგადოება, ზოგადად უკრაინაში შეჭრასთან დაკავშირებით. FSB დაინტერესებული იყო ნებისმიერი თანამშრომლობის შესახებ ინფორმაციით დასავლეთის უსაფრთხოების სამსახურებთან".

კიდევ ერთი ჯაშუში: 21 აგვისტოს ალბანეთში რუსეთის ორი და უკრაინის ერთი მოქალაქე სამხედრო ქარხანაში შეჭრისთვის, ჯაშუშობის ბრალდებით დააკავეს.

  • მათ შორის, ერთ-ერთი ლანა სატორია, რომელიც თბილისში წლების მანძილზე ცხოვრობდა.
  • ქალს სინამდვილეში სვეტლანა ტიმოფეევა ჰქვია და ლანა სატორინი ფსევდონიმია.
  • მისი მეგობრები ამტკიცებენ, რომ სამხედრო ბაზას საკუთარი ბლოგისთვის იკვლევდა, ხოლო პოლიცია ამბობს, რომ მასთან ერთად მყოფმა პირმა ჯაშუშობა აღიარა.
  • რუსი ბლოგერის ინსტაგრამიდან ირკვევა, რომ საქართველოს სხვადასხვა რეგიონსა და სოფლებში იმყოფებოდა — იღებდა მუზეუმებს, ძეგლებს, საბჭოთა არქიტექტურას, ასევე, ჩანს, რომ 2017 წელს იყო საქართველოს ოკუპირებულ ტერიტორიაზეც.

კიდევ რა გავიგეთ: ერთ-ერთ პოსტში ის ჰყვება, რატომ დატოვა რუსეთი. მისი თქმით, მრავალი მიზეზის გამო გაუჩნდა განცდა, რომ "ახლა რუსეთში ყოფნა სახიფათო და არასასიამოვნოა", თუმცა იქვე დასძენს, რომ მხოლოდ ომის დაწყების გამო არა.

  • წერს იმასაც, რომ საქართველო სასიამოვნო ქვეყანაა, ორჯერ არის ნამყოფი და "ბევრი საუბრობს რუსულად", არის ნაცნობი გარემო, კარგი ხალხი და ეკონომიკა ნორმალურ დონეზე.
  • მისივე თქმით, ზოგადად, რუსებს საქართველოში ცუდად არ ექცევიან, მაგრამ არიან ისეთებიც, ვინც მათი შემოდინებით უკმაყოფილოა.
  • აღნიშნავს, რომ საქართველოში აკეთებს იმას, რასაც მოსკოვში: "ვნადირობ საბჭოთა მემკვიდრეობასა და მონუმენტურ ხელოვნებაზე, ბევრს ვსეირნობ, ვგეგმავ გადაღებებს, ტურებს".

ქართულ ოცნების წევრი, ირაკლი ქადაგიშვილი ამ საკითხში "ცოტა ღრმად ჩახედვას" გვთავაზობს. მისი თქმით, რომ არა აგენტთა ამ ჯგუფის სამხედრო ობიექტზე შეჭრა, "შეიძლება ვერც ვერავის გაეგო" ამის შესახებ.

  • ოპოზიციაში კი ამბობენ, რომ რუსეთის მოქალაქეები, მათ შორის, FSB-ს აგენტები ქვეყანაში თავისუფლად გადაადგილდებიან, არ არსებობს უსაფრთხოების გარანტიები და კონკრეტულ დარღვევებზე სახელმწიფო არ რეაგირებს.