New York Times წერს, რომ ევროკავშირი რუსეთის პრეზიდენტის, ვლადიმერ პუტინისა და საგარეო საქმეთა მინისტრის, სერგეი ლავროვის ევროპულ აქტივებს გაყინავს, თუმცა მათ არ დაუწესებს სამგზავრო აკრძალვას.

მედია ინფორმაციას ორ დიპლომატზე დაყრდნობით ავრცელებს, რომლებსაც ევროკავშირის სანქციების პროექტზე წვდომა აქვთ. სანქციების პაკეტი სრულად ჯერ არ გამოქვეყნებულა.

Financial Times-ის ცნობით, ევროკავშირი სანქციების პაკეტის მიღებას დღეს გეგმავს. მედიის განცხადებით, რუს ლიდერებს მოგზაურობის აკრძალვებს არ უწესებენ, რათა დიპლომატიური ურთიერთობების არსებობის შესაძლებლობისთვის მზადყოფნას გაუსვან ხაზი. მათი ინფორმაციით, ლიდერებმა ეს აზრი ხუთშაბათს განიხილეს და დიდი ნაწილი იდეას მიემხრო.

ევროკავშირმა რუსეთს გუშინ ახალი, 5-პუნქტიანი სანქციები დაუწესა. ეს მოიცავს ფინანსურ შეზღუდვებს, რუსული ავიაკომპანიებისთვის თვითმფრინავებისა და სამხედრო აღჭურვილობის მიყიდვის, ასევე, დიპლომატებისთვის ვიზების გაცემის აკრძალვას.

პუტინმა უკრაინაში ომი 24 თებერვალს დაიწყო, რომელსაც თავად სპეციალურ "სამხედრო ოპერაციას" უწოდებს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში

გაიგეთ მეტი: