24 ივნისს, საფონდო ბირჟის დახურვის შემდეგ, ილონ მასკმა ტრილიონერის სტატუსი დაკარგა. მიზეზი Tesla-სა და SpaceX-ის აქციებზე ფასების მკვეთრი დაცემაა, რის გამოც ის ისევ მილიარდერების სიაში დაბრუნდა. Forbes-ის ბოლო მონაცემებით, მასკის ქონება ამჟამად $970.2 მილიარდს შეადგენს.

მასკი მსოფლიოში პირველი ტრილიონერი სულ ახლახან — 12 ივნისს გახდა. ეს მას შემდეგ მოხდა, რაც მისმა სარაკეტო, სატელიტური და ხელოვნური ინტელექტის კომპანიამ, SpaceX-მა, აქციები ბირჟაზე პირველად განათავსა. SpaceX-ის საფონდო ბირჟაზე გამოსვლა ისტორიაში ყველაზე მასშტაბური იყო. ამის შემდეგ, ილონ მასკის ქონება $1 ტრილიონს სტაბილურად აჭარბებდა.

მასკის სიმდიდრე მთლიანად აქციების ფასზე გახდა დამოკიდებული. რეალურად, ილონ მასკის მილიარდები ნაღდი ფული სულაც არაა, ის კომპანიების აქციებშია დაბანდებული. მიუხედავად ამისა, მისი სიმდიდრე მაინც უპრეცედენტოა როგორც თავისი მასშტაბით, ისე იმ სიჩქარით, რომლითაც ის გაიზარდა.

ფოტო: CNBC

მსოფლიო ბირჟებზე ტექნოლოგიური კომპანიების აქციების ფასების მკვეთრად ვარდნა ინვესტორების შიშმა გამოიწვია. ბაზარი შეაშფოთა მოლოდინმა, რომ ფედერალური რეზერვი საპროცენტო განაკვეთებს გაზრდიდა, რასაც ხელოვნური ინტელექტის "ბუშტის" გასკდომის შიშიც დაემატა. თუმცა, საფონდო ბირჟა ცოცხალი ორგანიზმია და ყველაფერი სწრაფად იცვლება. ასე რომ, თუ ხვალ Tesla-სა და SpaceX-ის აქციები ისევ გაიზრდება, მასკი ტრილიონერის სტატუსს კვლავ დაიბრუნებს.

მანამდე კი, 13-ციფრიანი ქონების გარეშეც, ილონ მასკი მაინც უმდიდრეს ადამიანად ითვლება. რეიტინგში მის მომდევნო ადგილზე Google-ის თანადამფუძნებელი ლარი პეიჯია, რომლის ქონებაც $284 მილიარდს შეადგენს.