"ოქტოპუსის" YouTube-არხზე "გაცოცხლებულ შოუში" გაჟღერებულ ხუმრობას, რომელიც, მათი განმარტებით, გამოგონილ პერსონაჟ რაპუნცელსა და ლეიკემიას ეხებოდა, კრიტიკა მოჰყვა. გუნდმა ოფიციალური განცხადება გაავრცელა, სადაც განმარტავენ, რომ ეს იყო იმპროვიზირებული "შავი იუმორი", რომელსაც მიზნად ონკოპაციენტების შეურაცხყოფა არ ჰქონია, თუმცა შექმნილი უხერხულობის გამო საზოგადოებას ბოდიშს უხდიან.

"ოქტოპუსი" ასევე წერს, რომ თუ ტელეკომპანია "იმედი" და გია აბაშიძე ცილისწამებისთვის ბოდიშს არ მოიხდიან, სასამართლოში უჩივლებენ.

"გვინდა გამოვეხმაუროთ ჩვენი გადაცემა "გაცოცხლებულიდან" გაჟღერებულ ხუმრობას, სადაც იუმორისტულ თემებს აგზავნის მაყურებელი და ჩვენ იმპროვიზირებულად ვხუმრობთ.

თემაზე "ზღაპრები რომ ცუდად მთავრდებოდეს" ჩვენმა ერთ-ერთმა მონაწილემ გამოგონილ პერსონაჟ რაპუნცელზე იხუმრა, რომ მას თმა ლეიკემიის გამო არ აქვს, რაც იყო შავი ხუმრობა, რომელიც არანაირად არ ისახავდა მიზნად ონკოპაციენტების დაცინვას, თუმცა გვესმის რომ ეს ხუმრობა ადამიანებისთვის შეიძლებოდა ყოფილიყო მტკივნეული და გვინდა ყველა ადამიანს, ვისაც ამ ხუმრობით ტკივილი მიადგა ან ეწყინა, ბოდიში მოვუხადოთ.

ონკოპაციენტები ჩვენც გვყოლია ოჯახში, სანათესაოშიც და ჩვენთვისაც ეს თემა სენსიტიურია, უბრალოდ ვცადეთ იუმორით შეგვეხედა ამ ყველაფრისთვის და სხვა განზრახვა მიზნად არ გვქონია.

აქვე განვმარტავთ რომ არცერთი ჩვენი სპონსორი და წარმდგენი შინაარსობრივ მხარეში მონაწილეობას არ იღებს და პასუხისმგებლობას მთლიანად იღებს ოქტოპუსის გუნდი, რადგან ჩვენ სარედაქციო დამოუკიდებლობა გვაქვს და კიდევ ერთხელ ვიხდით ბოდიშს მეგობრებო.

რაც შეეხება ტელეკომპანია "იმედს" და გია აბაშიძეს, თუ ბოდიშს არ მოიხდიან იმ ცილისწამებისთვის, რომელსაც მათი მხრიდან ჰქონდა ადგილი, რომ თითქოს ეს ხუმრობა მიმართული იყო ლეიკემიანი ბავშვების დაცინვისკენ, მაშინ სხვა გზა არ დაგვრჩება გარდა იმისა რომ მათ სასამართლოში ვუჩივლოთ.

ეს ცილისწამებაც ბოლო დღეებში აგორებული შავი პიარის ნაწილია, რაც განზრახ ისახავს ჩვენთვის რეპუტაციული ზიანის მოყენებას", — აღნიშნულია "ოქტოპუსის" განცხადებაში.

"ოქტოპუსის" განცხადებამდე, სოციალურ ქსელში სპეციალური მიმართვა გაავრცელეს ონკოპაციენტი ბავშვების მშობლებმა და მათი ოჯახის წევრებმა. ისინი გადაცემაში გაჟღერებულ შინაარსს შეურაცხმყოფლად მიიჩნევენ და პროექტის ავტორებსა და სპონსორებს საჯარო რეაგირებისკენ მოუწოდებენ.

"ლეიკემიის მქონე პაციენტების დისკრედიტაცია, მკურნალობის პროცესში ქიმიოთერაპიის გვერდითი ეფექტის სასაცილოდ წარმოჩენა და ადამიანების პირადი ტრაგედიის "შავ იუმორად" გარდაქმნა უცენზურო და შეურაცხმყოფელია.

მიუხედავად ჩვენი შვილების უმძიმესი დაავადებებისა და პირადი ტრაგედიებისა, იუმორი არ დაგვიკარგავს და ჩვენც გვეცინება ხარისხიან ხუმრობებზე, მდაბიო იუმორს გვერდს ვუვლით, თუმცა მსგავსი შეურაცხმყოფელი და მკურნალობის შედეგად დამდგარი ვიზუალური დაზიანებების სასაცილოდ წარმოჩენა ჩვენთვის კატეგორიულად მიუღებელია.

ვგმობთ მსგავს დამცინავ და შეურაცხმყოფელ დამოკიდებულებებს ჩვენი შვილების და თითოეული ონკოპაციენტის მიმართ და გადაცემის ავტორებსა და წამყვანებს, მათ შორის: Betsson sport-ს, გიორგი კალატოზს, ნიკა შევარდნაძეს და მათ კოლეგებს ვთხოვთ, გაიაზრონ და ბოდიში მოუხადონ ყველა იმ ადამიანს, ვისთვისაც ეს ისედაც მტკივნეული თემა შეურაცხყოფად აქციეს", — აღნიშნულია განცხადებაში.

განცხადებას ხელს აწერენ:

• ნინი მთვარაძე,
• მარიამ მითაიშვილი,
• თამუნა ჩახმახაშვილი,
• ნინო ელბაქიძე,
• სოფო ელოშვილი,
• თაკო თეზელაშვილი,
• ირმა გოგოლაძე,
• ირმა შენგელია,
• ინგა იაკობაძე,
• მეგი წაქაძე,
• ელზა ფარცვანია,
• ნათია ხიზამბარელი,
• ნანიკო ტორონჯაძე,
• დარეჯან სურმანიძე,
• ლია მესხიძე,
• ლალი ნარუშვილი,
• ანნა სააკაძე,
• ლელა ლომიძე,
• მევლუდი ჭულუხაძე,
• რუსუდან გიორგაძე,
• ნანა კუბლაშვილი,
• ბელა შუბითიძე.

სამთავრობო ტელეკომპანია "იმედს" და გია აბაშიძეს საპასუხო განცხადება ჯერ-ჯერობით არ გაუვრცელებიათ.