აშშ-ის ქალაქ სიეტლში, მსოფლიო ჩემპიონატის ფარგლებში, ირანისა და ეგვიპტის საფეხბურთო ნაკრებები ერთმანეთს დაუპირისპირდებიან. შეხვედრა შაბათს, 27 ივნისს ჩატარდება.

თამაში ზუსტად იმ დღეს ემთხვევა, როდესაც ლგბტქ თემის წარმომადგენლები ყოველწლიურ ფესტივალს მართავენ. ამის გამო, ეგვიპტისა და ირანის შეხვედრას უკვე "პრაიდის" მატჩი შეარქვეს.

ეგვიპტის ნაკრები.

ფოტო: Reuters

ირანის ნაკრები.

ფოტო: Getty Images

ეგვიპტის ფეხბურთის ასოციაციამ ოფიციალურ განცხადებაში აღნიშნა, რომ მათ FIFA-ს წერილობით მიმართეს და კატეგორიულად მოითხოვეს, მატჩის მსვლელობისას არანაირი ლგბტქ მხარდამჭერი აქტივობა არ დაეშვათ.

FIFA-ს განცხადებით, ისინი სტადიონზე ცისარტყელას დროშების შეტანას მაინც არ აკრძალავენ. აღსანიშნავია, რომ პრაიდის ღონისძიებებს თავად ქალაქი სიეტლი აორგანიზებს და მას FIFA-სთან პირდაპირი კავშირი არ აქვს. ორგანიზაცია Seattle Pride, რომელიც ქალაქში ყოველწლიურ აღლუმს მართავს, ხალხს მოუწოდებს, დღესასწაული ისე აღნიშნონ, როგორც თავად სურთ. ქუჩებში მარში და სხვადასხვა აქტივობაა დაგეგმილი.

2025 წლის სიეტლის პრაიდის ფესტივალი.

ფოტო: The Seattle Times

ირანის ფეხბურთის ფედერაციის პრეზიდენტმა, მეჰდი ტაჯმა და ეგვიპტის ფეხბურთის ასოციაციამ შექმნილი სიტუაცია მკაცრად დაგმო.

"2026 წლის მსოფლიო ჩემპიონატი ყველასთვის ღიაა და ნებისმიერ ადამიანს სიხარულით ვმასპინძლობთ. ჩვენთვის მატჩებზე ყველა გულშემატკივარი თანაბრად სასურველი სტუმარია, მიუხედავად მათი სექსუალური ორიენტაციისა თუ გენდერული იდენტობისა", — აღნიშნა FIFA-ს წარმომადგენელმა.

FIFA-ს 2026 წლის მსოფლიო ჩემპიონატის სტადიონებზე ქცევის კოდექსის მიხედვით, ცისარტყელას დროშები და სხვა სიმბოლიკები, რომლებიც სექსუალურ ორიენტაციასა თუ გენდერულ იდენტობას გამოხატავენ, ნებადართულია.

ვაშინგტონის შტატის სენატორმა, ჯეიმი პედერსენმა, აღნიშნა, რომ ამ მატჩის სწორედ ისეთი ქვეყნების მონაწილეობით ჩატარება, რომლებშიც ლგბტქ ადამიანებს დევნიან, სიმბოლურია. მისი თქმით, შეხვედრა კარგი შესაძლებლობაა იმისათვის, რომ თემის წარმომადგენლების მიმართ მსოფლიო პოზიტიურად განეწყოს.

ფოტო: Shutterstock

"არ ვიცი, რამდენი ადამიანი უყურებს ამ თამაშს ირანიდან და ეგვიპტიდან, მაგრამ ისინი ეკრანებზე აუცილებლად დაინახავენ ბედნიერ ლგბტქ ადამიანებს, რომლებიც საკუთარ დღესასწაულს ზეიმობენ. ჩემი აზრით, ეს შესანიშნავია და პრაიდის აზრიც სწორედ ამაშია", — დასძინა სენატორმა ჯეიმი პედერსენმა.

სიეტლის მერმა, ქეით უილსონმა განაცხადა, რომ ქალაქი შესაძლო საპროტესტო აქციებისთვის მზადაა და ამისათვის სტადიონის მიმდებარედ სპეციალური საპროტესტო ზონებია გამოყოფილი.

ასევე იხილეთ: